Shillong, Nailar 25: Ka Meghalaya High Court haka 24 tarik u Nailar kala pynkut noh iaka mukotduma jong ki nongshong dukan madan ka nongbah Shillong bad ki jaka kiba marjan, hadien ba ka sorkar jylla kala shim ia ka rai ban thaw iaki ‘Rules’ ban pyntreikam da ka aiñ jong ka sorkar pdeng haka jylla.
Ka iingkashari kala ong, “Namar ba kala don ka jingkylla kaba thymmai, khamtam haba iaka ain jong ka sorkar jylla la pynduh noh bad yn pyntreikam noh da ka ain jong ka sorkar pdeng, kumta ki ar tylli ki mudui bad lai tylli ki Writ Petitions kim don jingmut shuh”.
Ha ki jingujor, ka kynhun jongki nongdie madan kila ujor pyrshah iaka sorkar jylla bad ia ki bor kiba dei khmih ba kidei ban ithuh iaka jaka ban die ne ki jaka ki bym lah ban shong die jingdie.
Watla kala don ka ain jong ka sorkar pdeng ha kaba iadei bad ki nongdie surok, nongdie madan hynrei ka sorkar kala pynmih iala ka jong ka ain bad thaw ruh iala ki jong ki Rules.
Kane ka kam kala sahteng mynta la bun snem, naduh ba ka sorkar kala don jingthmu ban pyntreikam noh da ka ain jong ka sorkar pdeng haka jylla.
Ka iingkashari kala ong baka sorkar mynta kala leh ia katei bad kala thaw ruh ia ki Rules ne ka don haka lynti ban shna iaki Rules ban pyntreikam ia ka ain jong ka sorkar pdeng hapoh ka jylla.
“Da kaba shim iaka jinglap jong ka iingkashari bad halor ka jingiohi ba ki jaka paidbah kila dap da ki nongdie madan bad wat ki lynti iaid ruh kim lait shuh ban pyndonkam da ki nongiaid lynti, la pynmih ia katto katne ki kyndon ain thymmai” la ong ka iingkashari.
Ka iingkashari kala pynpaw ba ki nongujor ne kiwei pat ki kynhun lada ki don kano kano ka jingbym hun iaka jinglong jingman kaba mynta ne da kiwei pat ki daw, ki lah ban ujor thymmai katkum ka ain lada kim sngewhun iaka rukom pynbeit kaba thymmai. Kala rai ban pynkut noh iaka mukotduma namar iaka hukum kaba la pynmih nyngkong ka lah ban duh bor noh na ka jinglong jingman kaba thymmai.
Ka sorkar jylla haka 24 tarik u Nailar kala shim ia ka rai ban pynduh noh iaka Meghalaya Street Vendors (Protection of Livelihood and Regulation of Street Vending) Act, 2014 khnang ban ioh ban pyntreikam da ka ain jong ka sorkar pdeng ka Street Vendors (Protection of Livelihood and Regulation of Street Vending) Act, 2014.
