Shillong, Naitung 02 : U Myntri Rangbah ka Jylla Conrad K Sangma hynne ka sngi Ba-ar, ula pynurlong ia ka jingangnud jong ka kynhun tem Eastern Brook Band, ka kynhun tem ki samla ba duna ka bor iohi ki khmat, da kaba pynioh ia ki tiar tem kaba ki donkam.
Kane ka dei shibynta jong ka Meghalaya Grassroots Music Programme, ka flagship prokram jong ka Chief Minister Office (CMO) ban kyntiew bad kyrshan ia ki riew don sap trai jylla ka Jylla.
Ka kynhun tem Eastern Brook Band ka kynthup ia 4 ngut ki dkhot, kaba la sdang paw ha ki rynsan iaput iatem da ki jingtem bad jingrwai kiba sngewthiang, wat hapdeng ki jingeh ba ki iakynduh na ka jingbym lah iohi ki khmat.
Ka jingkyrpad jong ka kynhun ban pynioh ia ki tiar tem kala seisoh da ka jingshimkhia dalade u Myntri Rangbah ka Jylla, uba la iapbiej ia ka sap, ka jingaiti bad ka jingieid jong ki ia ka pur ka tem.
Ia kine ki tiar tem la aiti sha ki dkhot ka kynhun ha ka jingialang ba kyrpang, kaba la pynlong ha Iingsah u Myntri Rangbah. U Myntri Rangbah ula ai jingiaroh ia ka jingdon mynsiem jong ka kynhun bad pynshlur ia ki ba kin iai bteng ha kaban pynurlong ia ka jingphohsniew jong ki.
“Ka put ka tem ka don ia ka bor ban jam ia u pud bad wanrah lang shijaka ia ki briew. Nga sngewkmen eh ban kyrshan ia kane ka kynhun donsap jong ki nongtem nongput bad nga phaikhmat ban iohi ia ki ba kin kynjoh sha ka thong ba shajrong” ong u Myntri Rangbah.
