Shillong, K’lyngkot 16 : Ka Jylla Meghalaya hadien 50 snem ka jingioh Jylla pura, kala ioh ia la ka jong ka Engineering College bad pynurlong ia ka jingphohsniew jong u paid Nongshongshnong da ka jingshimkhia jong ka Sorkar Meghalaya Democratic Alliance (MDA) ba ialam ka National Peoples’ Party (NPP).
Kane ka Engineering College ka dei ka Shillong Government College of Engineering (SGCE) kaba don ha Mawlai Kynton Massar. Ia kane ka Engineering College ba nyngkong eh ka Jylla la plie paidbah hynne ka sngi nyngkong da u Myntri Rangbah ka Jylla Conrad K Sangma ha ka jingiadon ryngkat u Myntri ka Tnad pule puthi ma Lahkmen Rymbui.
Ia kane ka project la pyntreikam lyngba ka Rashtriya Uchchatar Shiksha Abhiyan (RUSA) bad la tei ia ka ha ka jinglut ba kot T. 26 klur. Kane ka College ka don ha ka campus ba 7.8 acre, hapoh ka campus jong ka Shillong Polytechnic, Mawlai Kynton Massar, East Khasi Hills, kaba heh kumba 16.11 acre.
Keeping our youth at the forefront, the NPP-led MDA Govt. is according priority to education. We are creating opportunities in different fields to ensure our youth are equipped to succeed in life & to drive the development of Meghalaya in the future. pic.twitter.com/tPLGnOiA1x
— Conrad Sangma (@SangmaConrad) January 16, 2023
Haba kren ha kane ka jingialang, u Myntri Rangbah ula ong ba ka jingpynleit jingmut jong ka Sorkar kala long beit ia ki samla ha kine ki san snem bad da kane ka jingmut jingpyrkhat, ka Sorkar kala wanrah ia kiba bun ki programme.
Ula ong ba ka Sorkar kala dep iaid survey bad dep iasyllok bad palat 90,000 ngut ki samla bad kala wanrah ia ka road map (lynti iaid) ban pyndonkam ia ka sap ba ki don. Ula pyntip ruh ba dei na kane ka jingwad bniah ba ka Sorkar kala wanrah ia ki prokram bapher bapher ba iadei bad ka sengkam sengjam, ki kam ialehkai bad ki kam iaput iatem lem bad kiwei kiwei.
“Ki samla ki dei ki nongkynti bad ka bor ba ngi don, lada ngi pyndonkam ia ka bor jong ki ha ka rukom kaba dei, ngi lah ban pynthikna ba ka Meghalaya kan dei ka Jylla kaba biang tam eh (Best) hapoh ka Ri namar ki samla ki don ia ka bynta kaba kongsan bha ban pyntyllun shakhmat ia ka lawei jong ka Jylla” ong u Conrad.
U Conrad ula kren ruh halor ki kam jong ka Sorkar ban kyntiew kyrdan ia ka pule ka dangle da kaba wanrah ia ki prokram kiban don jingiadei naduh ka koit ka khiah bad ka bor pyrkhat pyrdain jong ki Khunlung Khynnah. Ula ong ba lada ngi plan ban kyntiew ia ka pule ka dangle ha ka rta ba 20 snem, ka Jylla kan nym lah ban ioh ia kaei kaei kaba biang tam, kumta, ka Sorkar kala wanrah ia ki prokram kaba pynthikna ba ki Khynnah kin ioh ia ki jingbam teimet naduh ba ki dang khunlung bad ba kin ioh ruh ia ki jingpule kat kum ka rukom kaba dei.
Ula pyntip ruh ba ka Sorkar Jylla kan iai bteng ban pynleit jingmut ba kumno yn pynlong ia ki Nongshongshnong kiba la nang la stad, kaban long kum ka jingkynshew ban kyntiew shaphrang ia ka Jylla.
U Conrad ula pynbna ba ka Sorkar jong u kala kut jingmut ban don noh ia la ka jong ka State University ba nyngkong eh-ka Captain Williamson Sangma State University, kaba dang shu dep plie paidbah shen ha Balalgre, marjan bad ka Tura.
Kane ka Engineering College kan dei na ka bynta ki Degree Course jong ki lai tylli ki Technical Branch kata-ka Civil Engineering, Electrical Engineering bad ka Mining Engineering, ka ban pdiang ia ki samla pule haduh 30 ngut kawei ka Tnad.
Ka Sorkar kala thaw haduh 55 tylli ki kam ba kynthup ia 36 tylli ki kam Nonghikai bad 19 tylli ki Nongtrei (Non-Teaching Post). Ka Shillong Govt. College of Engineering (SGCE), Shillong kala applai ia ka jingai jingbit (permission) bad ka jingiasoh (affiliation) na ka NEHU ba kan sdang noh ia ka College, kaba ki kam ki jam ki dang iaid shakhmat mynta.
Ha une u snem pule 2022-2023, ka Shillong Govt. College of Engineering (SGCE), Shillong kala leh ia ka online application ban ioh jingmynjur na ka AICTE ba kan sdang ia ki Technical Course.
