Pynurlong ka Sorkar MDA ia ka jingdawa bala slembah ka thain Rambrai ban ioh C&RD Block

By
Ka Shlem
-
0
20

Shillong, Naiwieng 09 : Ka Sorkar Meghalaya Democratic Alliance (MDA) kala pynurlong mynta sa ia ka jingdawa bala slem bha jong ki paidbah ka thain Rambrai, West Khasi Hills da ka jingplie paidbah u Myntri Rangbah Conrad K Sangma ia ka Community & Rural Development (C&D) Block ba dang shu pynkha thymmai.

Ia kane ka C&RD Block la plie ha ka jingiadonlang u MLA ka thain Bah Kimfa Sidney Marbaniang, u MDC Bah Bajop Pyngrope bad u MLA ka Nongstoin Bah Macmillan Byrsat.

Ka Rambrai C&RD Block ka dei kaba la pynpait na ka Nongstoin C&RD Block bad kan kdup haduh 109 tylli ki Shnong kiba don haduh 36,148 ngut ki nongshongshnong. Ka jingheh jong ka jaka ba hap ha kane ka Block ka long 584.628 sq km.

Ka Rambrai ka dei kaba jngai kumba 20 Km eiei na Nongstoin kaba dei ka District Headquarter ka West Khasi Hills bad ki jaidbynriew kiba shong ha kane ka thain kiba bun ki dei ki Khasi bad ki Garo.

Haba kren ha ka jingialang, u Myntri Rangbah ula ong ba ka jingpynkha ia kane ka Block ba thymmai kan pynthikna ia ka jingsynshar khadar kaba janai haduh ki shnong ki thaw. Ula ong ruh ba lyngba kane ka Block, shibun ki kam pynroi kin sa wan bad ka jingshakri jong ka Sorkar ruh kan long kaba janai bha.

“Ki C&RD Block ki dei kiba shnat treikam kiba kongsan bha haba phai sha ki skhim bad ki prokram bapher bapher. Ki paidbah ka Rambrai kila hap ban mad ia shibun ki jingeh namar ka jinghap iaid jngai bah ban ioh ia ka jingshakri jong ka Sorkar. Ka jingplie ia kane ka Block kan pynthikna ba ka jingshakri kan don noh hajan jong u paidbah” ula ong.

U Myntri Rangbah ula pyntip ba ka Sorkar kala pynkhreh ia ki kyndon treikam ba thymmai ban pynsted ia ka jingai syrnot kiba bun jait na ki Ophis ki Block. “Ki paidbah ki lah ban applai ia ki syrnot bapher bapher ha ka Block hynrei ia kine ki application yn jap ban pyniaid da ki Sub Division” ula bynrap.

Haba pynpaw ba ka thain Rambrai ka dei kaba la shah iehbein la slem bha, u Myntri Rangbah ula ong ba lyngba ki prokram bapher bapher, ka Sorkar kan pynthikna ba ki paidbah kin ioh kheit ia u soh jong ki kam pynroi ha ka Jylla.

U Myntri Rangbah u pyntip ruh ba ka jingpyntrei ia ka surok Nongstoin-Rambrai-Kyrshai kala nang iaid shaid shaid bad shen yn sa lah ban pyndep noh ia ka. Ia kane ka surok la shna ha ka jingmang pisa ba kot T. 231 klur.

“Namar ka jingbym biang ka surok ha ka thain, ki paidbah kila hap ban mad ia shibun ki jingeh. Ngin pynthikna ba kane ka surok kan dep noh kloi” ula ong.

U Myntri Rangbah ula pyntip ruh ia ki paidbah ba ka Sorkar kan sa kyntiew kyrdan noh ia ka Rambrai Primary Health Centre (PHC) sha ka Community Health Centre (CHC) bad ka jingbuh mawnongrim ia kane, yn sa leh noh shen. Ula pyntip ruh ba ka Sorkar kala phah maramot ia kiba bun tylli ki skul LP kiba don ha Rambrai bad kin don ruh katto katne ki ban sa tei thymmai.

Haba phai sha ka Block, u Myntri Rangbah ula pyntip ba ka Rambrai C&RD Block kan treikam mynta na ka Ophis ba shipor katba ka jingtei ia ka Ophis ba thymmai ka dang iaid.

Ha kane ka jingleit jong u sha Rambrai, u Myntri Rangbah ula aiti ruh ia ka jingiarap song pisa lyngba ka Focus bad Focus plus sha ki nongrep nalor ka jingsam ia ki khun sniang bad ki kuroiler na ka skhim Rural Backyard Piggery and Poultry Scheme “Progress” bad ka song pisa sha ki Seng jong ki Samla na ka Yess Meghalaya bad ruh ia ka Community Investment Fund sha ki SHGs.