Nongstoiñ, Nailur 8: Ka Tnad Pulit ka Jylla (MLP) kala pyntreikam ia ka ain Cigarette and Other Tobacco Products (prohibition of Advertisement and Regulations of trade and commerce, Production, Supply and distribution Act 2003 ne (COTPA) ha West Khasi Hills District, kaba khang ia ki dukan die jingdie ban die ia ki kynja duma/cigarette hajan jong ki skul ne jaka pule.
Ki Pulit ka Nongstoin Police Station, hynne ka sngi Thohdieng kila pynlong ia ka jingkhynra ia ki dukan die jingdie kiba don marjan ki skul/jaka pule ha Sor Nongstoin kat kum ka ain COTPA.
Ka la long ruh ka jingpynkynmaw ïa ka thaiñ baroh kawei, ba ki nongbuh dukan ba kin kyndit bynriew ba kim dei shuh ban buh ia ki kynja duma/cigarette ne wat u kwai ha ki dukan jong ki lada kim dei kiba don palat ia ka 100 phut pajih na ki jaka pule.
Ïa katei ka jingleit khynra la lamkhmat da u bah K.Mawlong SI Nongstoiñ Police Station, ryngkat ka jingsynranlang ki battalion bad ki nongthoh khubor.
Ha kane ka jingkhynra, ki Pulit kila lap ba don shibun ki dukan kiba la die ïa kitei ki mar kiba la maham, namar ka jingbym tip ba la don ne pynjari lypa ïa katei ka aiñ.
Ki don haduh 29 tylli ki dukan ba shah pynngat ha ka ain katkum ka section 6b jong ka COTPA Act. Ïa kitei ki dukan kiba la leh pyrshah la daiñ kuna noh mardor bad ka jinglum na ka jingdain kuna ka poi kumba 1550 tyngka.
Kane ka kynhun khynra ka la leit sha kiba bun ki bynta ka sor Nongstoin naduh ki dukan ba don marjan ka St. Xavier Secondary School, Public School, Anderson Higher Secondary School, JJM Higher Secondary School, Sibsing Memorial Government Higher Secondary School bad kiwei kiwei.
