Shillong, Lber 12 : Ka Sorkar Pdeng ha ka sngi Nyngkong kala pyntreikam ia ka Citizenship Amendment Act (CAA) da ka jingpynmih ia ka Rule, hadien san snem ba mynjur ha Parliament. Kane ka jingpynbna kala mih tang da ki sngi shuwa ka jingpynbna ia ki tarik jong ka elekshon Lok Sabha 2024.
Ia ki application leh ban phah da ka online ia kaba la buh ruh ia ka web portal na ka bynta kane ka kam.
U Myntri kam pohiing ka Ri Amit Shah ula ai ka jingiaroh ia ka jingpynmih ia ka Citizenship (Amendment) Rules, 2024 bad ong ba ka jingpyntreikam ia ka, kan ailad ia ki rit paid ba shah thombor na ka jingiapher niam ha Pakistan, Bangladesh bad Afghanistan ba kin ioh long Nongshongshnong ka Ri India.
Ka CAA kaba la mynjur da ka Parliament ha ka 11 tarik Nohprah, 2019, ka dei ka mat iatai kaba la jur bha bad ki jingiakhih pyrshah ia kane ka ain kala mih ha kylleng ki Jylla jong ka Ri India.
Kat kum ka Gazette ka India ba 12 tarik Nohprah 2019, la ong “Ym don eiei ha kane ka kyndon ka ban treikam ha ki jaka riewlum ka Assam, Meghalaya, Mizoram bad Tripura kiba shah kdup ha ka Sixth Schedule jong ka Riti Synshar ka Ri bad ki jaka kiba treikam ka “Inner Line” kat kum ka Bengal Eastern Frontier Regulation, 1873”.
Katto katne ki bynta jong ka Meghalaya, khamtam ha Nongbah Shillong, ki dei ki bym hap satia hapoh ka Sixth Schedule. Kine ki jaka ki kynthup ia ka European Ward, Municipal Area bad ka Contonment Area.
Watla ka CAA kala pyllait ia baroh ki jaka riewlum hynrei, ki jaka (bala kdew haneng) ki dei kiba don hapdeng eh jong ka sor Shillong, kaba hap hapoh ka jingtreikam jong ka Citizenship Amendment Act.
Ki jingiakhih kila mih ha Assam, ka Jylla ba marjan ka Meghalaya bad ki Kynhun Liang Pyrshah jong ki 16 tylli ki seng sain pyrthei kiba don ha ka kynhun synrop United Opposition Forum, Assam (UOFA) kila khot ia ka jingiakhih da kaba sangeh treikam ha ka sngi ba-ar ha baroh kawei ka Jylla nalor kiwei pat ki jingiakhih kiba la pynkhreh ban pynlong ha ki sngi ban wan.
Hadien ka jingmynur ia kane ka Act ha u Nohprah 2019, hynriew ngut ki briew kila iap ha Assam, 19 ngut ha Uttar Pradesh, 2 ngut ha Karnataka bad 42 ngut kila iap ha ka jingiaumsnam pher jaidbynriew ha Delhi.
Ha Meghalaya, arngut ki briew kila iap ba kynthup ia uwei u dkhot ka Khasi Students Union bad kumba 10 tylli ki jingjia shah dung tari ki briew namar ka CAA.
 da ka jingpynmih ia ka Rule, hadien san snem ba mynjur ha Parliament. Kane ka jingpynbna kala mih tang da ki sngi shuwa ka jingpynbna ia ki tarik jong ka elekshon Lok Sabha 2024.){kind=link}