Shillong Nailar 25: Ka Ganesh Das Government Maternal and Child Health Hospital hynne ka sngi Thohdieng, kala pynlong ia ka prokram ha kaba iadei bad ka jingsdang pyntreikam iaka kor ‘Scan & Share’ lyngba ka Ayushman Bharat Digital Mission (ABDM).
Ia ka ABDM la sdang ha u Nailur, 2022 da ka sorkar India da ka jingthmu ban pynkhlain ia ki kor ki bor ha ki jaka ai jingsumar kiba don ha ka ri India baroh kawei. Kane ka jingthmu ka long ban kyntiew ia ka jingpyndonkam ia ki kor teknoloji bad ban pynthikna ba ki nongpang kin ioh ia ka jingsumar sukher kaba biang bad kumjuh ban buh ryntih ia ki rekod jong ki nongpang ha kaba ki Doctor kin lah ban khmih bniah.
Ia kane ka prokram la plie da u Principal Secretary ka tnad ka koit ka khiah u Sampath Kumar ryngkat ka jingdonlang u Bah Sandy Osmond Khongmawpat, State Program Coordinator, ABDM Meghalaya, ki bor pyniaid jong ka Ganesh Das Hospital bad kiwei kiwei.
Ka ‘Scan & Share’ kadei ka rukom treikam kaban pynsted ia ki nongpang kiba wan phah sumar ban rejistar ialade ha kaba ki lah ban Scan ia u QR Code uba don ha kino kino ki ABDM kiba don ha ki jaka sumar, kin Install bad rejistar ha ka Ayushman Bharat Health Account (ABHA) app, kin ai ia ki jingtip ha ki hospital bad kin sa iohdpiang ia u ‘Registration Token’ bad kin sa ioh ruh iaka Out-Patient Slip na ka Registration Counter ktakum ka jingioh Token ka jongki.
U Principal Secretary ula pynpaw la kane ka rukom pyntreikam katkum ki kor teknoloji yn lah ne em ban pyniar ia ka jingtreikam naka bynta ki nongpang kiba don ha ki thain nongkyndong ha kaba yn btah ia ki ba kin leit shim dawai na ki Doctor katkum ka jinglong jingman jong ka jingpang kaba ki don.
Ula ai jingmut ba ia kane ka rukom treikam dei ban ialeh ban pyndonkam bha khamtam haba ki nongshong shnong ha ki thain nongkyndong jong ka jylla, ban ai iaki jingnang jingtip kiba bniah ha kaba iadei bad ki rukom ioh jingsumar ia ki jingpang kaba ki lah ban ioh ha ki Primary Health Centre.
U Sampath Kumar ula plie ruh iaka Microbiology Lab; ka Unidirectional Flow ha ka Operation Theatre Complex; ka Counter Bathymmai jongka PMJAY bad MHIS bad iaka Biomedical Waste Storage House bad kiwei kiwei.
