Shillong, Naitung 20: Ka Sorkar Jylla kala sdang pyntreikam biang ia ki kyndon jingbthah ban iada ia ka jingsaphriang jong ka khlam Covid-19 namar ka jingshem ba kane ka jingpang kala sdang ban kiew biang ha Jylla.
Kat kum ka hukum bala pynmih da u Secretary ka Tnad Home (Political) ka Sorkar Jylla Bah CVD Diengdoh hynne ka sngi balang, ula ong ba baroh ki Nongshongshnong ki dei ban bud ia ki kyndon jingbthah kynthup ka jingdeng ia ki mask bad ka jingpynjngai ialade na kiwei pat ki para briew.
Une u Heh Ophisar ula ong ba kane ka long halor ka jingkiew ka jingiabit jingpang jong ki briew hapoh ka Ri bad ka jingpynkylla ia ka hukum ba pynmih ha ka 11 tarik Rymphang 2022.
Kat kum ka jingai jingkhein ka Tnad ka Koit ka Khiah ka Jylla, ki briew kiba dang iabit thymmai ia ka jingpang ha kine ki arphew saw kynta bala leit noh, kala kot ia ka 102 ngut katba kiba dang ioh ia ka jingkoit ki long 16 ngut.
Ka jingdon jong ki briew ba dang don ia ka jingpang ne ka active case ha Jylla kila kot ia ka 358 ngut bad kiba bun eh ki don ha West Garo Hills-170 ngut bud sa ka East Khasi Hills-103 ngut.
Ki briew kiba la iabit ia kane ka jingpang haduh mynta kila kot 94511 ngut bad na kine, 92558 ngut kila ioh pat ia ka jingkoit katba 1595 ngut kila iap naka jingpang.
Une u heh Ophisar ka Tnad Home (Political) ula ong ba baroh ki Nongshongshnong kiba la dei ban shim ia ka dawai iada (precautionary dose), kila dei ban shim noh bad la pynbeit ruh ba kan don ka Special Vaccination Camp ne ka camp ai injek kyrpang kum shibynta naka Vaccination Amrit Mohatsav ka ba sdang naduh ka 15 tarik Naitung haduh ka 30 tarik Nailur.
Une u Heh Ophisar ula pyntip ba kine ki camp kin long ha baroh ki Ophis kiba la heh la ka dei jong ka Sorkar ne riew shimet, ki karkhana, ka ISBT, ki skul bad ki college. U ong ba ia kiba dep ai injek, yn sa air uh ia ki syrnot ba pyndep ia ka jingai jinginjek.
Haba kylli, u Myntri ka Tnad Pule Puthi Ma Lahkmen Rymbui ula ong ba ka Tnad Pule Puthi kala peit thuh bha halor ka jingkynkiew kynsan kiba iabit ia ka jingpang Covid-19 hapoh ka Jylla.
“Ngi la peitthuh bha ia ka jinglong jingman mynta” ula ong haba pyntip b aka Sorkar Jylla kala pynmih ia ka jingpynbna ba bthah ia baroh ki Deputy Commissioner jong ka Jylla ba kin shim rai hala ki jong ki jong ki jaka kat haba shah ka kam.
U Myntri ula pyntip ruh ba kam pat don satia kano kano ka jingthmu jong ka Sorkar ban pynmih ia ka hukum ban khang shuwa ia ki Skul hapoh ka Jylla.
