SHILLONG, FEB 19: U Myntri ka Tnad Public Health Engineering Marcuise N Marak ula pyntip ha Iingdorbar thawain ba ka Sand Quality Testing ne jingtest ia u Shyiap, u ban pyndonkam haba tei ia ki Water Projects ia mynta la aiti sha ka NIT, hynrei ka sorkar ka don ia ka jingthmu ban buh noh la ka jong ka Lab ha Shillong, Tura bad Jowai.
Kane ka jingai jingpynshai kala mih hadien ba u MLA na ka TMC u Rupa M Marak ula kren halor ka jingtih syiap na ki wah bad pynpaw ia ka jingsngewkhia hadien ba kala don ka jingmad kaba sngewsih nalade shimet.
“Nga sheptieng ba ka lah ban long ka bym shngain. Nga lah duh ia i mie jong nga ha u snem 2024 haba ka top um kala khyllem halor jongi” ula ong bad ka kylli la mynta ka don kano kano ka jingteh lakam da ki kyndon.
U Myntri ula pynthikna ba ia ka Testing la leh wat na ka bynta ka jingshna ia ki water-tank project kiba rit.
“Ki contractor kiba la ioh ia kam ki hap ban phah leh ia ka Sand Testing sha ka NIT. Kila pyniaid shakhmat ia ki kam katkum ka contract kaba iaid ryngkat bad ki kyndon jong ka IS” la ong u Marcuise Marak.
Ula pytnhikna ba yn leh da kaba tyngeh lada ki kontraktor ki pynkhein ia ka contract. “Khlem pep, lada ngi ioh pdiang ia kano kano ka jingujor, ngi ngin leh da kaba tyngeh”.
Katba u MLA ka VPP u Brightstarwell Marbaniang ula wanrah ia kawei pat ka mat, halor ka jinglait um na ka dam ha Lum Shyllong–Shiliang-Um kaba la tei dang ha u snem ba la dep.
Haba jubab halor kane, u Myntri ula ong, ba ka long kaba kongsan ban ioh ia ka Third-Party Certification hashwa ban pyllait ia kano kano ka jingsiew hapoh jong ka JJM.
“Nga kwah ban kyntu ia ki dkhot ba lada phi lap ia kino kino ki jingdkoh, long kiba iai mlien ban pyntip, khnang ba un ioh ban pynlong ia ka jingtohkit bad ban lah ban leh da kaba tyngeh”.
