Shillong, Lber 3: U Myntri ka tnad Bording u AT Mondal hynne ka sngi Nyngkong ula ong ba ka mat kaba iadei bad ka jingai wai ia ka jaka sha ka Maitshaphrang Tourism Promotion Group (MTPG) kadei kaba la dep ban ia pynbeit da ka jingiakren.
“Ia kane ka kam la dep biang ban iakren pynbeit bniah bha bad mynta ngi lah ban ia pynbeit da ka jingiakren,” ong u Mondal haba jubab ia ka zero hour notice ba la wanrah da u MLA ka VPP North Shillong Bah Adelbert Nongrum halor ka jingshim rai jong ka MTPG ban pynlong ia ka jingiakhih hakhmat ka to secretariat halor katei ka mat.
U Mondal ula iathuh ba ka dewlynnpng Lumpongdeng kaba don ha Pung Umiamha ka jaka kaba 1, 64,797.48 sqm lane 40.72 akar kadei kaba la longtrai da ka MeECL.
Ka jaka kaba kot 1 Akar lah ai wai sha ka Maitshaphrang Tourism Promotion Group (MTPG) na ka bynta 10 snem naduh ka 7 tarik u Rymphang 1997 haduh ka 6 tarik u Rymphang 2007 bad ka jingsiew man la ka snem ia ka bai wai ka long T.10,000 shi snem bad kan don ka jingpynkiew kaba 5% man la ka snem.
Kumta ia ka bai wai lah pynjlan katkum ka jingkyrpad jong u nongshim wai namar ba ka jaka kaba don kam pat dei kaba la pyndonkam da uba shim wai.
U Myntri ula ong ba ia katei ka jaka mynta la donkam da ka sorkar (MeECL) na ka bynta kiba bun ki kam pynroi.
La pyntip ia u chairman jong ka Maitshaphrang Tourism Promotion Group (MTPG), Shillong lyngba ka shithi kaba ha ka 11 tarik u Naiwieng 2024 ba kan ym don shuh ka jingpynjlan ban ai wai ia katei ka jaka hadien ba ka jingai wai kala kut noh ha ka 31 tarik u Nohprah 2024.
Ula ong ba ka MTPG, Shillong kala ioh ia ka jingjyrpad ban pyllait noh ia katei ka jaka bad ia ki jingtei kiba la pynieng katkum ka Clause ba 7 jong ka lease agreement kaba la ong, “Lada ka jaka, ha kano kano ka por hashwa ban kut ka por jong ka jingiatehkular, lada donkam da ka Board Corporation ban pyndonkam ialade, uba shim wai hadien ba ula ioh ia ka jingpyntip kaba shi bnai, dei ban pyllait noh ia ka jaka bad ki jingtei bad ka Board ne kiban shimti pat kin don ia ka bor ban pyndonkam ia ka jaka, uba ioh shimwai yn ioh pat ia ka hok ban weng noh ia ki jingtei baroh kiba la pynieng da ma ki ha katei ka jaka hapoh jongka shi bnai”.
“U Chairman ka MTPG lyngba ka shithi kaba ha ka 15 tarik u Kyllalyngkot 2025 ula kyrpad ia ka MeECLban pynjlan ia katei ka jingai por khnang ba kan lah ban shimkhia ia katei ka mat bad ki bor kiba dei khnih. Ia katei la pdiang bad la pynjlan haduh ka 15 tarik u Rymphang 2025 ban ailad ba kin iaid shakhmat ban leh ia kaba donkam katkum ka Clause kaba 7 jongka Land Lease Agreement,” ula ong.
 kadei kaba la dep ban ia pynbeit da ka jingiakren.){kind=link}