Nongpoh, Jymmang 26: U MLA ka UDP na Nongpoh Bah Mayralborn Syiem, ula pyntip ba ka United Democratic Party (UDP) kan sa shimkhia bha ia ka mat ban pynkylla thymmai noh ia ka State Reservation Policy na ka bynta ka bit ka biang jong baroh ki Jaidbynriew kiba don hapoh ka Jylla.
Une u MLA ula pynsngew ia kane hakhmat ki lad pathai khubor hadien ka jingiakynduh bad ki paidbah ka Nongspoh Constituency, kiba la leit tur sha Iingsah jong u hynne ka sngi Thohdieng, ban dawa ia u MLA ba un kyrshan ia ka jingdawa pynkylla thymmai noh ia ka Policy.
“Nga kyntu ïaki paidbah nongshong shnong ka Nongpoh constituency ba kin sngewbha ban ai ïaka jingïatreilang bad ba kin ïai shah, namar naka liang ka Party UDP kan shimkhia ïakane ka kam naka bynta ka jingmyntoi jong u paidbah” ula ong.
U Bah Mayralborn Syiem, u la pynpaw ka jingsngewkmen ban ïoh ïa kynduh ïaki paidbah bad khamtam ki khun samla jong ka nongpoh kiba la wan ban ïakynduh ban pynsngew halor ka jingkwah ban pynkylla ïaka Reservation Policy hapoh ka jylla. U la pynpaw ruh ïaka jingsngewburom bad jingsngew nguh ïaka jingai jingmut jong ki.
“Kum u MLA nga don ka jingsngewkhia halor kane ka mat, hynrei kadei ka mat kaba khia bad ka ba jylliew bha” ula ong.
Une u MLA ula pyntip ba ka UDP kala dep buh ha ka mat ialap elekshon (election manifesto) ban shong bishar thymmai noh ia ka State Reservation Policy.
“Ka State Reservation Policy kala don lypa haka mat treikam jong ka party (UDP) ba ka hap ban ïakren bad phylliew jingmut kumno ban pyntreikam bha ïa ka policy, hynrei kum ki nongïalam kam long ban shu leh khluid ha kane ka bynta” ula ong.
U Bah Mayralborn ula ong “Ka party UDP mynta ka dang don ha ka lynti ban peit ban khmih bad ban pynwan dur khnang ba kan long ka jingmyntoi naka bynta ka ri khasi jaiñtia bad ka jylla hi baroh kawei bad ba kan nym ktah ïano ïano, namar kum ki nongïalam ba ki paidbah ki la jied ngi kwah ban wan rah ïaka jingshong suk jingshong shngaiñ hapoh ka jylla baroh kawei”.
