Shillong, Nailur 08 : U Lamphang ka Iingdorbar Thomas A Sangma ula pyntip ba shen un sa shim ia ka rai halor ka ujor bala buh hakhmat da ka Congress, ba dawa ban mait kyrteng ia ka jinglong MLA ki 4 ngut ki nongthaw ain, kiba leit pyniasoh sha ka National People’s Party (NPP).
Ia kane ka ujor la mudui da u Secretary ka Meghalaya Pradesh Congress Committee (MPCC) Bah Manuel Badwar hapoh ka Rule 6 jong ka Meghalaya Legislative Assembly (Disqualification on Ground of Defection) Rules, 1988 pule lang bad ka para 2(1)(a) jong ka Tenth Schedule ka Riti Synshar ka Ri, 1950.
Kane kala mih hadien ba u MLA ka Mylliem Bah Ronnie V Lyngdoh, ula mih noh na ka Congress bad weng noh ia ka mukotduma na ka Iingkashari Meghalaya High Court pyrshah ia ki lai ngut ki MLA – Celestine Lyngdoh (Umsning), Charles Margnar (Mawhati) bad Gabriel Wahlang (Nongstoin).
U Bah Ronnie V Lyngdoh ula leit pyniasoh ialade sha ka NPP ha ka 30 tarik Naitung katba ki laingut ki MLA kila pyniasoh ha ka 19 tarik Nailar 2024.
U Lamphang ula ai ka jingithuh ia ki jingpyniasoh kine ki 4 ngut ki MLA sha ka NPP.
Haba kylli, u Thomas ula ong ba dang shen ula ioh pdiang ia ka mudui ba 92 sla na ka Congress bad kam lah long ia u ban lah shim rai noh mar mar.
“Nga la phah ruh ia kane ka mudui sha ka kynhun nongsaid ain ba kin ai jingmut bad ki dang iakhmih ia ka bad nga ruh nga dang pule bniah ia ka” ula ong haba iakren bad ki nongthoh khubor ha ka sngi Nyngkong.
U Lamphang ula kular ba un sa shim noh shen ia ka rai. “Kan ym slem shuh. Shen hi ngan sa shim ia ka rai” ula ong.
.){kind=link}