Guwahati, Jylliew 09: U Myntri Rangbah ka Assam Himanta Biswa Sarma ula pyntip ba un sa leit iuhkjat ha Jylla Manipur lashai ka sngi Saitjain bad un iakynduh ruh ia u Myntri Rangbah ka Manipur N Biren Singh lem bad ki Nongialam ban iaphylliew jingmut halor ka jinglong jingman hapoh kane ka Jylla ba don hapdeng ka thma iapher Jaidbynriew.
Hynne ka sngi thohdieng, ka Iingkashari Supreme Court kala kyntait ban shong bishar kyrkieh ia ka jingmudui jong ki arngut ki Nongshongshnong ka Manipur kaba long pyrshah ia ka jingiai pynjlan ia ka hukum ba khang ia ka kor Internet hapoh Manipur.
Ka Iingkashari u Justice Aniruddha Bose bad Rajesh Bindal kala ong ba ka High Court kala dep shong bishar ia kum kane ka juh ka kam.
Ka jingkhang ia ka kor internet ha Manipur la pynjlan haduh ka 10 tarik Jylliew kat kum ka hukum bala pynmih da u Commissioner (Home) H Gyan Pradesh.Kane ka jingkhang ia ka kor internet ka dei kaba la treikam naduh ka 3 tarik Jymmang.
Jan 100 ngut ki briew kila iap bad 310 ngut kila mynsaw ha ka thma iapher jaidbynriew ha Manipur. Haduh mynta, ki don haduh 37,450 ngut ki briew kiba la shong riehtngen ha ki 272 tylli ki ktem ba shipor jong ki shipai bad ka Sorkar.
