Shillong, Risaw 5: U Symbud Myntri Rangbah ka Jylla u Bah Sniawbhalang Dhar hynne ka sngi Palei, ula pyntip ba kan sa don ka jingiakren bad ka Harijan Panchayat Committee bad la khmih lynti ba kane ka jingiakren kan long hadien ka shuti Puja.
U Bah Dhar ula kdew ba wat ka iingkashari kala hukum ia ka sorkar jylla ba kadei ban pyndep ia katei ka kam hapoh une u snem, kumta kin ialeh ban pynbeit noh ia kane hashwa ban kut u 2023.
“Ia mynta lehse ki ophisar ki dang bunkam bad ki prokram bapher hynrei tang shu kut ka shuti Puja ngin ialeh ban pynbeit kloi noh ia kane ka kam. Kadei da ka jingiakren bad ngi khmih lynti ba kaei kaban mih kan long kaba bha” ong u Bah Dhar.
Ula iathuh ba kam shym la don kano kano ka jingdawa kaba thymmai hynrei kila kyrpad pat ban don ka jingpynkylla hangne hangta ia ka jingdawa kaba kila dep ban dawa kham mynshwa.
