Shillong, Iaiong 10: U Symbud Myntri Rangbah ka jylla bah Prestone Tynsong u ba dei ruh u Chairman ka High Level Committee (HLC) hynne ka sngi ula iathuh ba ka Harijan Panchayat Committee (HPC) kan sa wan iakren mynta ka taiew bad ka sorkar halor ka jingpynkynriah noh iaki 342 tylli ki Longiing ba sah Them Iew Mawlong.
Haba kren sha ki lad pathai khubor u bah Prestone ula ong ba ka HPC ka khlem pat phah satia ia ka jubab halor ka Blueprint jong ka sorkar hynrei kala paw haki lad pathai khubor ba kila long kiba la pynkhreh ban wan iakren noh bad ka sorkar mynta ka taiew.
U bah Prestone ula ong ba ka sorkar ruh kan sa phah ktien biang sha ka HPC ban wan shaka miej iakren halor ka jingthmu ban pynkynriah noh ia baroh kiba sah ha Them Iew Mawlong.
“Naka liang ka sorkar kala dep ban pynkhreh iaka Plan lane ka Blueprint haba iadei bad ka jingthmu ban pynkynriah noh iaki sa kawei ka jaka sah bad mynta ka shong sa haka rai jong ka HPC ban wan iakren halor kane” la ong u bah Prestone.
