Shillong, Nohprah 06: U Symbud Myntri Rangbah ka jylla u bah Prestone Tynsong hynne ka sngi u la iathuh ba ka sorkar jylla haka step jong ka 7 tarik mynta u bnai kan ujor daka Defamation Case ne ka mukotduma bai mynrain khmat pyrshah ia u National Spokesperson ka All India Trinamool Congress (AITC) u Saket Gokhale.
Lah ban kdew ba haka 4 tarik mynta u bnai u Saket Gokhale u la kynnoh ba u Myntri Rangbah ka jylla bad u Commissioner and Secretary ka tnat Planning D. Vijay Kumar kila pyndonkam bakla haduh T.632 klur ka pisa lyngba ka company Meghalayan Age Limited.
Haba pynshai ia kane, u bah Prestone u la ong ba kane ka jingkynnoh u nongaiktien ka AITC kam don nongrim bad kadei kaba bakla jur namar ka sorkar Meghalaya kala iasoi bad ka sorkar pdeng ban pyntrei iaki porjek kiba kot haduh T.731 klur bala mang daka NDB.
U bah Prestone u la iathuh ba kine ki projek bapher bapher hapoh ka Meghalaya Eco Tourism Infrastructure Development Project (NEIDP) kidei kiba la bei tyngka daka NDB haka jinglut kaba T.731 klur naka bynta u snem 2022 haduh 2026.
“Kane ka jingkynnoh khlem nongrim da une u national spokesperson ka AITC kam dei shuh ka sien ba nyngkong bad dei namar kane ka sorkar jylla ruh kala thait ban sngap bad dei namar kane ka sorkar kala shim iaka rai ban ujor daka mukotduma bai mynrain khmat pyrshah ia u Saket Gokhale haka 7 tarik mynta u bnai” la ong u bah Prestone.
Kum ban shu pynkynmaw hynne ka step ki Pulit ka jylla Gujarat kila kem ia u Saket Gokhale halor ka jingkynthoh jong u pyrshah ia u myntri rangbahduh ka ri India u Narendra Modi haba iadei bad ka jingkyllem noh kawei ka jingkieng ha kane ka jylla.
U bah Prestone u la iathuh ba naka bynta ban pyntrei iaki projek lyngba ka NEIDP kiba dei jong ka tnat PWD, Tourism bad ka Sports, ka sorkar ka hap iaid lyngba ki kyndon ka NDB bad dei namar kane la thaw iaka Meghalayan Age Limited ban peit ba ki kam ki jam ki iaid beit iaid ryntih katkum ki kyndon.
U la iathuh ba wat iaki Tender ruh la hap khot hi da ki tnat kiba kine ki projek ki hap la kadei ka PWD, Tourism ne ka Sport bad katkum ki kyndon ka NDB ia ki Tender ruh hap khot lyngba ka juk Online khnang ba baroh ki ioh lad ban shim bynta.
“Kane ka jingkynnoh u Saket Gaokhale kadei ka bym don nongrim bad kaba bakla suda bad ka paw shai kdar ba ka AITC ka kwah ban ialam bakla iaki paidbah namar ka ilekshon kala jan artad” la ong u bah Prestone.
