Shillong, Naitung 20: U Myntri Rangbah ka jylla u Conrad K Sangma hynne ka sngi Palei ula pyntip ba shen yn sa iakynduh ia ki dkhot jongka A’chik Conscious Holistically Integrated Krima (ACHIK) kiba dang pynlong mynta iaka jingiakhih da kaba shah thngan ha Tura ban dawa pynlong iaka sor Tura kum ka Winter Capital bad ban pyntreikam iaka Roster System naduh ki snem kiba mynshwa.
Haba iakren bad ki nongthoh khubor hadien ba la wai ka jingialang jong ka Kynhun Myntri, u Myntri Rangbah ka jylla ula pyntip ba ula buddien ia katei ka jingiakhih da kaba iakren man la ka sngi bad u Deputy Commissioner.
U Myntri Rangbah ula ong ba ka ACHIK kala pynpaw ba kin pynsangeh noh ia ka jingshah thngan tang ynda kila ioh iakynduh shwa ia u.
“Ha kine ki 3 sngi kiba la dep, u DC ula pyntip ia nga, ba ula dep ban iakren bad ki (ACHIK) ba ki kwah ban iakynduh ia u ha ka jingleit jngoh ka jongu iaka rilum Garo bad kumta kin sa pynsangeh noh ia katei ka jingiakhih hynrei katei kam shym la urlong satia. Kumta nga la phah iaka khubor sha ki ba ngan iakynduh ia ki ha ka jingleit ka jong nga sha rilum Garo” ong u Conrad.
“U DC ula buddien man la ka sngi, ki Majistor bad ki Doktor ki don beit ha ka jaka iakhih man la ka por, kumta ka don beit ka jingdon ka jong ngi ha katei ka jaka bad ngi la khmih bniah bha iaka jinglong jingman” ual ong.
Ha kaba iadei bad ka jingdawa ba dei ban pyntreikam naduh ki snem kiba mynshwa iaka Roster System, u Myntri Rangbah ula ong, ka sorkar kala kren shai bad dep shim ruh ia ka rai ban pynkylla thymmai iaka Office Memorandum tang hadien ba kala dep ban iasyllok bad baroh kiba don bynta kynthup iaka kynhun ACHIK kaba la donlang ha ka jingialang.
“Hadien katei ka jingialang, ka ACHIK ruh kala donlang, kila pynpaw iaka jingsngewkhia bad ngi la dep ban pynshai ia kitei ki jingsngewkhia bad hadien katei ka jingialang, ngi la shim lang ia ka rai bad ngi la iaid shakhmat bad ka OM. Kumta ban phai ban khmih biang sa shisien ka long kaba eh bha” ong u Myntri Rangbah ka jylla.
Halor ka jingdawa iaka Winter Capital, u Myntri Rangbah ula ong ba ki bynta bad ki ishu jong ka roi ka par ka long kaba kongsan tam ia ka sorkar MDA na ka bynta ban pynthikna ba ka roi ka par yn leh ha kata ka rukom ha kaba baroh ki thaiñ bad ki jaka kin ioh bynta lang.
Ula ban jur iaka jingkongsan jong ki Mini-Secretariat bad yn bhah tyngka bun bad kan don ka jingkylla dur ha ka rukom ai jingshakri kaban jia ha Tura.
“Ngan sa shong ban iakren bad ka kynhun ACHIK ban pynsngewthuh iaka jingmyntoi lyngba ka jingdon jong ki Mini Secretariat”, ula ong.
“Ngin sa iohi iaka roi ka par ha baroh ki liang haka jingsam ia ki skhim bad ka jingdon ia ki bor synshar kiba khlain ha kine ki sngi ban wan bad ha kisnem ban wan” la bynrap u Conrad.
U Myntri Rangbah ula pyntip ba ka jingtei iaka Governor House ha Tura ka lah jan dep artad bad la khmih lynti ba hapoh une u snem katei ka iingsah u Lat kan sdang ban treikam noh.
Pule ruh: Kurup ki BSF ia ki kulai ba thmu khaii tuh sha Bangladesh
 kiba dang pynlong mynta iaka jingiakhih da kaba shah thngan ha Tura ban dawa pynlong iaka sor Tura kum ka Winter Capital bad ban pyntreikam iaka Roster System naduh ki snem kiba mynshwa.){kind=link}