Shillong, Risaw 14: U Myntri Rangbah ka jylla u Conrad K Sangma hynne ka sngi thohdieng ula pyntip ba ka Sorkar Jylla kan sa wanrah shuwa da ka Ordinance ban pynduh pyndam noh iaka aiñ khalai ne ka Meghalaya Regulation of Gaming Act, 2021.
U Myntri Rangbah ula pynpaw ia kane haba jubab ia ka jingkylli ki nongthoh khubor la ka Sorkar ka don jingthmu ban lum ia ka dorbar kyrpang jong ka Iingdorbar Thaw Ain ban pynduh pyndam noh ia ka Gaming Act kumba la pynbna da u Myntri ka Tnad khajna James K Sangma.
“Kumba ju leh hi barabor, haba pynduh pyndam ia kano kano ka aiñ la leh da kaba wanrah shwa iaka Ordinance bad ia katei ka Ordinance yn sa mynjur pat hapoh ka ïing dorbar” ong u Conrad Sangma.
“Kumba ngi leh ia ka ain ki nongdie madan, ngi la wanrah shuwa da ka Ordinance bad la pynskhem pat ia ka ha Iingdorbar Thaw An” ula bynrap.
Kat kum ka jingong jong u, ka jingpynduh pyndam ia kino kino ki ain ka dei ban iaid shuwa da ka Ordinance bad kane ka dei ka lynti kaba dei ban iaid.
Halor ka jingkylli ba ha ka jingbym don shuh ka aiñ, ha kano ka lynti pat yn teh lakam ia ki kam khalai be-aiñ, u Conrad Sangma u la ong, “Kin ym don shuh kino kino ki jingpyrkhing, kumta kane kadei ka khana kaba don ha kawei pat ka liang bad mynta ngin long biang kumba ngi ju long baroh shi katta. Ngin hap ban peit kumno ban iaid shakhmat halor kane ka bynta”.
Ula ong, “U Myntri ka tnad Taxation ula iakynduh ia kiba bun balang ha kaba kila pynpaw iaka jingsngewkhia bad kumta naka bynta ka bit ka biang jong baroh bad hashwa ban yn ai iaka jing pynbna ula dep ban iakren bad nga bad ngi la pyntip ruh sha kiwei pat ki dkhot bad kumta ula ai iaka jingpynbna”.
Haba kylli la kane ka jingshim rai jong ka sorkar ka dei namar ba la jan ka elekshon, u Myntri Rangbah ula ong, “Kum ka sorkar kala iengskhem haka nongrim ban sngap iaka sur jong u paid bah bad kum kine kila jia la bunsien bad ngi sngew haba ki paidbah ki don iaka jingsngewkhia kumta ka sorkar ka hap ban sngap. Lada ka elekshon ka don ne kam don, ka sorkar ka hap ban sngap iaka sur jong u paidbah bad kane ka sorkar kala buh hakhmat eh ia kane ha kiba bun ki bynta”.
Ula ong ka jingwanrah ka sorkar ia katei ka aiñ khalai ka long ban khang ia ki paidbah ba kin ym ioh rung ha ki jaka khalai bad kino kino kiba kwah ban plie iaki jaka khalai kin hap ban shim shwa iaka lisen, kumta na ka jingbym don ka aiñ baroh kin long biang kumjuh kumba long mynshwa.
