Shillong, Lber 11 : U Myntri Rangbah ka Jylla Conrad K Sangma ha ka sngi Ba-ar, ula ong ba ka samoi shim klas jong ki artylli ki Science bad Commerce College ha Mawphlang bad Mahendraganj kin hap ban sdang noh khnang ba ki samla pule kin nym duhnong.
“Ngi tip bha ba ka jingpyndep ban tei ia ki jingtei (building) kala shim bun ka por hynrei ngi sngew ba ngi dei ban sdang noh ia ka samoi shim klas (jong ki ar college) khnang ba ki samla pule kin nym duh ei….Kat haba don ki jaka ba lait jong ki building, ngin sdang noh ia ka jingshim klas” ong u Conrad haba jubab ha ka kynta kylli jingkylli ha Iingdorbar.
Ula kular ruh ban pynthikna ba ki contractor ki dei ban pyndep noh ia ki jingtei jong baroh ki building.
Shuwa kane haba wanrah ia ka kaiphod halor ka jinglong jingman jong ka Science bad Commerce College ha Mawphlang, u Myntri ka tnad Pule Puthi Rakkam A Sangma ula pyntip ba ka jingiaid jong ki jingtei baroh kila kot ia ka 86%. Ka por bala buh thymmai ban pyndep ia ka project ka dei mynta u Lber 2025.
U iathuh ba ka Sorkar kala phah ktien ia ka jingmynjur ban pynkha haduh 46 tylli ki kam haba bynrap ba ka jingpynkhreh ia ka mang tyngka ban ring bording elektrik shabar, ka jingring um shabar bad ka jingsiang rong ia ka surok ban leit sha ka college kaba dang iaid mynta.
Haba iadei bad ka Science & Commerce College ha Bahsapara (Mahendraganj), u Myntri u iathuh ba ki jingtei kiba la dep pyntrei kila kot 66% bad la buh por ban pyndep iaka project hapoh ka 31 tarik Lber, 2026.
U iathuh ba ka Sorkar kala phah ktien ia ka jingmynjur ban pynkha haduh 46 tylli ki kam haba bynrap ba ka jingpynkhreh ia ka mang tyngka ban ring bording elektrik shabar, ka jingring um shabar bad ka jingsiang rong ia ka surok ban leit sha ka college kaba dang iaid mynta.
Nalor kane, u Myntri ula ong ba ka song pisa bala mang da ka Sorkar India sha ka project Science & Commerce College ha Mawphlang ka long T.33.55 klur. Ia kane ka pisa la mang ha ka 30 tarik Jylliew 2017 bad ka bhah ka dei 90:10 ha kaba haduh T.31.1685 klur la dep ban pyllait.
Katba ia ka pisa bala mang da ka Sorkar India sha ka Science & Commerce College Bahsapara (Mahendraganj) ka long T.36.31 klur ha ka 30 tarik Jylliew 2017, kaba ka bhah ka long 90:10 bad na kane, haduh T.23.5274 klur lah dep ban pyllait.
