Shillong, Naiwieng 09 : U Myntri Rangbah ka Jylla Conrad K Sangma hynne ka sngi Balang ula ong ba ka wat ba-ar jong ka jingiakren pynnbeit pud hapdeng ka Meghalaya bad ka Assam kan sa long hapoh une u bnai ba mynta.
Haba iakren bad ki nongthoh khubor, u Conrad ula ong “Shibun ki kam kila sdang bad ki Committee bapher bapher kila leh iala ki homework bad dep sdang ia ki jingiasyllok. Hooid ka dei kaba phi ong, ka jingiakren bad ka Assam kam pat sdang satia ia kaba la khmih lynti ba kan long noh. Ha une u bnai Naiwieng, ngi lah ban pynlong ia ka jingiakren ba nyngkong eh”.
U Myntri Rangbah ula bteng “Nga don jingkyrmen ba hapoh une u bnai Naiwieng, ngi dei ban lah ha kaban pynlong ia ka jingialang ba nyngkong bad baroh ki Regional Committee bad kyrmen ruh ba ngin lah ban sdang noh ia ka jingiakren jong ka wat kaba ar bad ka Assam”.
Haba pynpaw ba la dep ruh ban iakren dang shen bad u Myntri Rangbah ka Assam u Himanta Biswa Sarma halor kane ka kam , u Conrad ula ong ba ki ar Jylla kin sa lah ban iakynduh hadien bala kut ka jingwan jong ki Myntri ka sorkar Pdeng sha ka thain Shatei Lam Mihngi bad hadien bala kut ka North East Olympic Games.
