Shillong, Jylliew 03 : U Myntri Rangbah ka Jylla Conrad K Sangma hynne ka sngi Saitjain, ula pyntip ba ka Sorkar Jylla kan sa lum ia ka jingialang jong ka Kynhun Myntri ha ka taiew ban wan ban shim noh iaka rai halor ka jingpyntreikam ia ka Roster System jong ka Job Reservation Policy hapoh ka Jylla.
U Myntri Rangbah ula pyntip ia kane hadien ka jingialang bad ki Sengbhalang lem bad ki Kynhun bapher bapher ka Ri-lum Garo kaba long hynne ka sngi ha Circuit House, Tura. Haduh 18 tylli ki kynhun kila wan ban iashimbynta ha kane ka jingialang ban iatai halor ka jingpyntreikam ia ka Roster System bad ka jingbishar thymmai ia ka Reservation Policy.
Ia u Conrad la synran da ki Myntri Sorkar, u Chief Secretary bad ki Heh Ophisar ka Sorkar Jylla. Ka thong ba hakhmat eh jong kane ka jingialang ka long ban ai ia ka jingbatai kaba bniah halor ka Roster System bad ka jingtreikam jong ka.
“Hadien ka jingai jingbatai, kila don shibun ki jingkylli bad jingpan jingshai, ia kiba ngi la pynshai. Kiba bun ki Dkhot kila sngewthuh bad kila mynjur. Ngi kyrmen ba ha kine ki 2-3 sngi ban wan, ynda ngi la leit phai sha Shillong, ngin sa lah ban shim ia ka rai ha ka Kynhun Myntri ban pyniaid shakhmat ia ka kam ba iadei bad ka jingpyntreikam ia ka Roster System” ong u Conrad haba iakren bad ki nongthoh khubor hadien ka jingialang.
U Conrad u pyntip ba ha ka jingialang, katto katne ki dkhot kila pynsngew halor ka Reservation Policy bad pan jingpynshai halor ka Committee kaba la thung da ka Sorkar. Ula ai jingpynshai ba ka jingialang jong baroh ki seng sain pyrthei kila ai jingmut ban thung ia ka Expert Committee ia kaba ka Sorkar kala mynjur bad kala leh ia kaba donkam.
“Ka kam ban thung ia ki dkhot ka Committee kan sa sdang noh shen, ia kaba yn sa iatai ha ka jingialang jong ka Kynhun Myntri. Hadien bala dep thaw, ka Committee kan sa pynlong ia ki jingiasyllok bad ki kynhun bapher bapher, leit iuhkjat ha baroh ki jaka ka Jylla, kan bishar ia ki jingthmu jong ka Reservation Policy bad kiwei kiwei. Ka Committee kan sa phah pat ia ka kaiphod ba bniah sha ka Sorkar Jylla, ia kaba ka Sorkar kan sa nang iakren shuh shuh ia ka” ula ong.
Namar ki jingsngewkhia jong kiba bun balang, u Conrad ula pynshai ba ka Committee hi kam dei kaba lah ban shim rai. Ka jingmut jong ka Committee ka long ba kan ngam jylliew bad shimia ki jingai jingmut ki stad ki jhad halor kane ka kam. Ka Sorkar kan sa shim ia ka rai ia kaei kaba dei ban leh ka ban long kat kum ki jingai jingmut ka Committee.
U pyntip ba ka Kynhun Myntri ka ban iakynduh lashem taiew, kan sa shim ia ka rai bad ia ki jingtip baroh halor ka Roster System yn sa pyntip sha ki paidbah ba kin sngewthuh khambha halor ka jingtreikam jong ka.
