Shillong Jylliew 03: Ka HYC Shillong City kala pynpaw iaka jingbym sngew iahap iaka hukum jong ka Deputy Commissioner ka East Khasi Hills District ban buh da u Odd & Even number ia ki kali kamai ban rung ha ki thaiñ Khyndailad bad Motphran bad ban pynkit tang ha ki kali kamai halor ka jingdheng kali ha Sor Shillong.
“Balei hap pynkit tang ha ki kali kamai halor ka jingdheng kali ha sor shillong? Baroh ngi hap ia kit lang bad ia tynrong lem ia kane ka kam. Ki driver & handyman jongki kali kamai bun ki wan na ki longiing ba kham duna ka ioh ka kot. Kane ka ktah jur ia ka kamai bad ia ka ioh ka kot jong ki driver bad ki handyman” la ong u Bah John Lyngdoh, President, HYC Shillong City ha ka kyrwoh khubor.
Ula pynpaw ba ki don bun ki daw jong ka jingdheng kali namar ka jingbym lah ka sorkar ban shna pynheh iaki surok, ka jingbym lah ban shna iaki Flyover, ka jingbun ki kali bad kiwei, kumta ym dei than ban pynkit tang ha ki kali kamai ba kidei ki daw jong ka jindheng kali ha sor Shillong.
Ka Seng ka ai jingmut ia ka DC ban weng ia ka jingdheng kali ha Shillong, kata ban don noh da ki School, College & University Bus ha man ki School, College & University ha Nongbah Shillong, ban buh noh da ki bus na bynta ki nongtrei sorkar bad ba ki nongtrei sorkar kidei ban pyndonkam da kine ki Bus haba wan trei bad ki nongtrei sorkar ki hap ban da siew iaka bai bus ym dei ban shu ioh shong ei.
“Ki kali kiba wan na Assam kiba thmu ban leit sha Silchar ym dei shuh ban shah ba kin iaid na Shillong hynrei kin iaid na Shillong Bye Pass bad ki kali ba wan na Assam bad kiwei ki jylla kidei ban sangeh noh tang ha Mawlai Mawiong ISBT bad kin shim noh da ki Local Taxi & Local Tourist ban rung sha Shillong ne sha kiwei ki jaka leit jngohkai” la ong u nongialam ka HYC.
Ula ong ba donkam ban pynsngewthuh ia ki paidbah kiba pyndonkam ia ki kali shimet ba katba lah ei dei ban nym sei than ki kali shimet jongki hynrei ban ialeh ban pyndonkam da ki kali ar shaka ne da ki kali kamai.
Ka HYC kala ai jingmut ruh ba dei ban pynheh noh ia baroh ki surok ha sor Shillong bad khap sor. Ka sorkar kadei ban ia kren bad ka Ministry of Defence ba kin ai iaki jaka ba donkam sha ka sorkar ban ioh pynheh surok, ban shna Parking Lot, Flyover bad kiwei kiwei.
Dei ban pyndep noh kloi iaka Shillong Western Bye Pass, dei ban shna ki surok thymmai kum ha Mawblei / Madanrting – Lumparing – Upper Shillong. Na Mawtawar – Mawpat sha New Shillong, na Malki – Shillong Peak shaduh Laitkor.
Nangta dei ban plan bha ban don ki Tram bad ki Cable Car bad dei ban pyndep noh kloi ia ka New Shillong Township khnang ban ioh rah ia shibun ki ophis sorkar sha NST bad ka Sorkar kadei ban pynbiang ia ki school, college, University, hospital bad ki ophis sorkar ha khapsor bad ha ki nongkyndong, khnang ba ki paidbah kin nym tuid than sha Shillong.
Ka HYC kala ai jingmut ruh ba ka sorkar kadei ban shimkhia ban kyntiew ia ka roi ka par, ia ka rep ka riang, ka ri jingri bad kiwei ki lad ai kam kaba ki briew na nongkyndong kin nym wan tur than sha Shillong na ka bynta ban iohkam.
Ka sorkar bad ki District Council kidei ban shimkhia ban kyntiew ia ki iew ki hat ha nongkyndong khang ba ki briew kin nym shaniah than ha ka siew ka pet tang na Iewduh Shillong.
Ka HYC kala pynpaw ba ka jingdheng kali kadei ka kam kaba hap iakitkhlieh lang, kam dei ka kam ba ngin ia pynkit tang ha ki katto katne bad lada iatreilang da baroh yn lah ban pynduna ia kane ka jingeh.
