Shillong, Nailur 10 : U Myntri Rangbah ka Jylla Conrad K Sangma ula kular ba ka Sorkar kala shim bun ki lad ki lynti ban leh eiei halor ka jingsngewkhia ba iadei bad ka jingrung ki poi ei hapoh ka Jylla.
Haba jubab ia ka cut motion ha Iingdorbar ha ka sngi Balang, u Conrad ula ong ba ka Sorkar kala lum man ka por ia ka jingialang bad ki kynhun bapher bapher kynthup ki shipai BSF bad ka Intelligence Bureau (IB), ban iatreilang ha kaban khanglad ia ka jingrung tuh.
U Myntri Rangbah ula pyntip ruh ba ka Sorkar kala nang pynbor ia ki briew ha man ki jaka talasi bad pynthikna ia ka jingiadon bynta lem ki shnong ki thaw ban khanglad ia ka jingwan rung ki poi ei.
“La bthah ia ki Deputy Commissioner ba kin iatreilang bad ki shnong ki thaw ha khappud bad ban ai ka jingkyr shan ban khang ia ka jingrung ki poi ei” ula ong haba bynrap ba ka Sorkar bad ki BSF kila pynlong ia ka jingtalasi man ka por ha ki highway bad kiwei ki jaka, kaba lam sha ka jingioh bat ia kiba bun ngut ki poi ei.
Kat kum ka jingong jong u, ka Sorkar kam shym la peitkai ia ka jinglong jingman hynrei kala shim ia ki sienjam kiba tyngeh ban pyrrkhing ha ki jaka khappud bad khanglad ia ki jingjia ki bym sngewtynnad.
U Myntri Rangbah ula pyntip ruh ba ka jingiakren halor ka jingshngain ki jaka khappud bad ka jingrung ki poi ei kala poi ruh sha ki kyrdan ba halor eh jong ka Sorkar India.
