Shillong, Lber 22 : U Myntri Rangbah ka Jylla Conrad K Sangma hynne ka sngi Balang, ula ong ba ka Sorkar kala tip shaphang ka kam thang bad khaii beain ia u rnga bad kam shym la shu shongkli kti ban tehlakam ia kane.
Haba jubab ia ka call attention bala wanrah da u MLA ka UDP na Nongpoh Bah Mayralborn Syiem ha Iingdorbar, u Conrad ula ong ba ka Tnad kala shim ia katto katne ki sienjam ban tehlakam ia ka jingkhaii tuh ia u rnga da kaba thaw ia ki kynhun pahara jong ki Nongtrei ka Tnad Forest ba kin bat ia ka jingkhaii beain ia u rnga, tian bishar ia kiba pynkhein ha ki Iingkashari, kurup ia u mar ba khaii bad ba pyllang nalor kiwei kiwei.
Ula ong ba ki karkhana Ferro Alloy, kiba pyndonkam ia u rnga, la ju leit jurip man ka por ioh don ka jingpyllait tuh bad pyndonkam beain ia u dewiong ha ki karkhana jong ki.
Ha Ri-Bhoi bad West Khasi Hills District, ha kine ki san snem bala leit, 23 tylli ki case lah dep ban ujor sha IIngkashari ba khaii tuh, thang lane pyllait ia u rnga.
Ha West Khasi Hills District marwei, haduh 13 tylli ki case la ujor ha u 2022 ba thang rnga beain.
Nalor kane, ka Tnad kala kurup haduh 95 metric ton u rnga ha kine ki san snem bala leit bad ka pisa baroh bala ioh lum ka long T. 2,60,000.
Dang shen, u DFO ka Nongstoin ula pyrshang ban tehalkam ia ka kam thang bad khaii beain ia u rnga da kaba kyrpad ia u District Magistrate ban pynjari da ka kyndon 144 CrPC hapoh ka District.
U Myntri Rangbah ula ong ba ka lah ban nym iahap ban ong ba ka jaka treikam jong ki Nongtrei ka Tnad Forest kala shah pyntroin namar ka para 3 (1)(b) jong ka Sixth Schedule kaba buh da u pud u sam iaka Tnad Forest ha ka jingsumar ia ki Khlaw kiba dei tang kiba long trai ka Sorkar kum ki Reserved Forests, Protected Forests, National Parks bad Wildlife Sanctuaries.
Kat kum ka jingong jong u, ka jingsumar ia ki Khlaw palat na ki khlaw ka Sorkar, ki hap hapoh ka jingkhmih jong ki Autonomous District Council (ADC).
Pule lang ia kane: Bluit mih ka Vision Document ka VPP da ka Hindi – “Ym sngewthuh Hindi hynrei thoh bad pule te nang”
