Imphal, Naitung 20 : U Myntri Rangbah ka Manipur N Biren Singh ha ka sngi Palei, ula ong ba hadien ka jingsaphriang ka video ba pyniaid lyngkhuit ia ki arngut ki Kynthei, ki Pulit ka Manipur kila sdang ban kem ia ki briew ba donkti hynne ka step.
U CM ula thoh ha Twitter “Ka mynsiem jong nga ka leit sha ki arngut ki Kynthei kiba mad ia ki jingshah leh tohmet kumba la paw ha ka video ba saphriang hynnin ka sngi. Hadien ba shim ia ka Suo-Moto case halor kane ka jingjia, ki Pulit ka Manipur kila shimkhia marmar bad kila kem briew hynne ka step”.
“Ka jingtohkit kaba bniah kala iaid mynta bad ngin pynthikna ba baroh kiba donkti kin ioh ia ka jingpynsajia ba tyngeh, kaba lah ruh ban long da ka jingrai pyniap. Ai ban iatip baroh, kam don jaka satia ia kum kine ki kam ba itriem ha ka imlang sahlang” ula ong.
Ula ong “Ngi iohi ia ka video bad kala pynmong bha ia nga. Ka dei ka kam bymman pyrshah ia ka longbriew manbriew. Nga la hukum mar mar ia ki Pulit ban kem ia ki briew ba donkti bad ka Sorkar kan pyrshang ban pynthikna ia ka jingrai pyniap ia kiba donkti”.
Ka Video kala ktah shisha shisha :SC
Ka Iingkashari Supreme Court hynne ka sngi kala ong ba ka video ba mih hynnin ka sngi kala ktah shisha shisha ia ka jing sngew bad u Chief Justice of India DY Chandrachud ula bthah ia ka Sorkar ban shim ia ka sienjam ba tyngeh.
“Ka dei ka bym lah pdiang. Ban pyndonkam ia ki Kynthei kum ki atiar ha ka thma iapher Jaidbynriew. Ka dei ka jingiuhroit ba bei-riti tam. Ngi i pangmet shisha da kane ka video kaba la mih paidbah. Lad aka Sorkar kam leh eiei, ngin leh ma ngi. Ka dei ka por ia ka Sorkar ban tuklar bad leh eiei. Ka dei ka bym lah ban pdiang ha kane ka riti synshar paidbah” ong u CJI.
