Shillong, Risaw 31: U Myntri Rangbah ka jylla u Conrad K Sangma hynne ka sngi ula pyntip ba ki pulit kila dep ban kem ia uwei uba donkti ha kaban shoh bad pynjulor ia ki kali haka jingiaid Rally ka FKJGP ha kine ki ki khyndiat sngi kiba la dep.
“Uwei ula shah kem bad kila don 3 tylli ki ejahar kiba la ujor halor katei ka jingjia bad ki don bun ngut ki briew (ia kaba ngam kwah ban iathuh katno ngut) la dep ban ithuh ba kidei kiba hakhmat eh ban ktah kti iaki riewpaidbah kiba lui lui bad yn sa leh da kaba tyngeh pyrshah ia ki” la iathuh u Conrad K Sangma haba iakren bad ki nongthoh khubor.
U la ong, ha katei ka jingjia kila don 3 ngut ki briew kiba mynsaw tangba kim shym la mynsaw jur bad kila ioh iaka jingsumar bad kila don 3 tylli ki kali kiba la shah pynjulor kiba kynthup ia ki kali bad ki thuk thuk bad kawei ka kali jong ki shipai kaba la julor malu mala bad nalor kane kam shim la don kano kano ka jingjulor jong kiwei pat ki kali jong ki paidbah.
“Ym lah ban shu ong, ba kadei ka jingpulom jong ka tnad Syntiat haba don kum katei ka jingjia khamtam haba ki sengbhalang kila pan jingbit ban pynlong iaka prokram bad ba kin bud ryntih iaki kyndon jingpyrkhing bad kumta ki bor pyniaid distrik kila don ka jingshaniah halor kane, hynrei kaba la pynkyndit ia baroh ka long ba kala mih katei ka jingjia bad ki don tang katto katne ngut ki briew ia kaba la dep ban ithuh bad na ki 1500 ngut ki briew kiba iashimbynta haka Rally ki don tang katto katne ngut kiba la donkti ha ka kam thombor bad kumta kane kala pynkyndit ia baroh” ong u Myntri Rangbah ka jylla .
Ula ong, katei ka jingjia kan pynlong ruh iaka sorkar jylla ba nangne shakhmat kan pynjur shuh shuh ia ki jingpyrkhing bad ban shim shuh shuh ia ki lad ki lynti ban peit ioh mih shuh shuh ia ki jingjia kiba lah ban kham heh shuh shuh bad ban long kiba la pynkhreh ha baroh ki bynta.
U Conrad ula iathuh, ba hynne ka sngi ula lum iaka jingialang bad ki heh ophsiar sorkar bad ki heh pulit ka jylla halor ka jingjia ha ka nongbah Shillong ha kine ki sngi ki ba la dep bad ka sorkar kala bthah ia ki pulit ba kin leh ia kaba donkam bad ban pynkhreh nangne shakhmat ia ki jingpyrkhing kiba kham tyngeh.
Held a meeting with @DC_EKH and @MeghalayaPolice to review the law & order situation. pic.twitter.com/jyVnTQfsIP
— Conrad Sangma (@SangmaConrad) October 31, 2022
