Shillong, Risaw 13: U Myntri Rangbah ka Jylla Conrad K Sangma ula pynbna ba ki kam ki jam bala leh na ka bynta ban shimti noh ia ki skul SSA bad ban pyntreikam ia ka tulop bala shna (pay structure) jong ki palat 14000 ngut ki Nonghikai kala don ha ka bynta ba khatduh ban pyntreikam.
Ia kane la pyntip da u President ka Meghalaya SSA Schools Association (MSSASA) Aristotle C Rymbai hadien ka jingiakynduh bad u Myntri Rangbah ha ka sngi Nyngkong.
“Ka jingialang ka long kaba sngewtynnad. U Myntri Rangbah ula pyntip ia ka Seng ba ki jingpynkhreh ia ki kot ki sla ba iadei bad ki jingdawa ba sahteng ki nonghikai SSA ba iadei bad ka jingshimti noh ia ki skul SSA…bad ba iadei bad ka jingpyntreikam ia ka tulop ia ki nonghikai SSA kala don ha ka bynta ba khatduh” ong u Bah Aristotle haba iakren bad ki nongthoh khubor.
U pyntip ba ka jingialang ban buddien la buh ban long la sngi Palei, ha kaba u Myntri Rangbah, u Myntri ka Tnad Pule Puthi Bah Lahkmen Rymbui bad ki Ophisar ka Tnad Pule Puthi kin sa iakren shuh shuh ia kane ka kam.
“Ha ka sngi Palei (16 tarik Risaw), kan sa don ka jingialang ka ban pyniaid da u Myntri Rangbah.. yn sa wanrah ia baroh ki mat ha ka jingialang” ong u Bah Aristotle haba bynrap ba ka Seng kala rai ban ap ia ka jingmih na kane ka jingialang.
Lah ban kdew, palat 3,332 tylli ki skul SSA ha Meghalaya kila aiti ia ki No Objection Certificate (NoC) ban aiti noh ia ka bor pyniaid sha ka Sorkar Jylla, napdeng ki 5,131 tylli ki skul SSA ha ka Jylla. Na kine, ki don 298 tylli ki skul Balang bad ki skul SSA ba pyniaid da ki riewshimet.
 jong ki palat 14000 ngut ki Nonghikai kala don ha ka bynta ba khatduh ban pyntreikam.){kind=link}