Shillong, Nailar 02 : U Myntri Rangbah ka Jylla Conrad K Sangma ula ong ba ki kam kila iaid shaid shaid ha kaban pynbit pynbiang ia baroh ki jingdonkam jong ka State University.
U Myntri Rangbah ka Jylla ha ka 14 tarik Kyllalyngkot, ula plie paidbah ia kane ka State University ba nyngkong eh ka Jylla bala tip kum ka Captain Williamson Sangma State University kaba don ha ka Shnong Balalgre, South West Garo Hills District.
Haba iakren bad ki nongthoh khubor hynne ka sngi Balang, u Myntri Rangbah ula kubur ba kala don ka jingslem ha kaban thaw iala ka jong ka State University hynrei mynta hadien 50 snem, ka Sorkar kala lah ban wanrah ia la kajong ka State University bad ki kam kila sdang shaid shaid.
“Nga sngewthuh ba katba ngi dang pynbiang ia ki jingdonkam, ka jingkhmih lynti kan don beit. Hynrei ka State University kala dei ban don la slem bha. Mynta kala sdang bad ha ka bynta kaba nyngkong, ngin sa buh ruh ia ka Campus lane ka Office jong ka State University ha Shillong ruh” ong u Conrad.
Hynrei, u Myntri Rangbah ula pyntip ba ka jingthmu ban wanrah sa kawei ka University hapoh ka Jylla ia mynta hi kam pat don. Ula ong ba ka Sorkar kan hap ban khmih ia shibun kiei kiei kynthup ka pla tyngka shuwa ban shim ia kum kane ka rai.
“Hooid, ngi hap ban sdang nyngkong da kane kaba don mynta, lehse ngi lah ban pyrkhat sa kawei pat ka University. Ailad ia ngi ban pynbit pynbiang shuwa ia kaba nyngkong, ngin peit kumno ka iaid, buh ia ki campus ha kylleng ki bynta jong ka Jylla ha kat kaba ngi sngew donkam. Bad hadien ngi lah ban rai ia ka bynta kaba ar” bynrap u Conrad.
