Shillong, Rymphang 16: U Myntri Rangbah ka jylla Conrad K Sangma ha ka sngi Nyngkong ula pyntip hapoh ka Iingdorbar thawain ka jylla ba ki Enforcement Team kila dep ban pynpra haduh 6 tylli ki Crane ne kali khwai kiba la pyndonkam ha ka jingtih dewiong be-ain bad kila kurup 6 tylli ki trok kiba kit ia u dewiong hadien ka jingjia 5 tarik Rymphang ba bthei ka par dewiong ha Mynsngat–Thangsko, East Jaintia Hills, kaba lam sha ka jingiap briew kaba la kiew haduh 33 ngut.
“Ki kam ban pynduh bad pynjulor ia ki Crane bad ka jingkurup ia ki kor bad ia ki mashin jingtih dewiong be-ain kala sdang, ha kaba baroh 6 tylli ki Crane la dep ban pynjulor, kila don baroh 6 tylli ki kali kiba la pyndonkam ha kaban kit be-ain ia u dewiong kiba la ioh ban kurup haduh ka 13.02.2026” la pynpaw u Conrad ha ka suo-motu statement ha ka dorbar mang tyngka kaba sdang hynne ka sngi Nyngkong.
“Nalor kane ki pulit kila pyndonkam ruh da ki Drone ban khmih bniah ia ki kam ki jam jong ka jingtih dewiong be-ain” ula bynrap.
U Sangma ula pynpaw ruh ha kaba iadei bad ki bynta jong ka jingsei ia ki met, ha kaba ha ka sngi kaba nyngkong la sei 18 tylli ki met, 4 tylli ha ka 6 bad 7 tarik u Rymphang. Lah ioh sei ia ki 8 ngut kiba mynsaw bad hadien 4 ngut kila khlad noh ha ki hospital ha Shillong bad Guwahati.
Lah ioh jingtip ba kila don 2 ngut kiba la khlad ia kaba la pyntip da ki bahaiing bahasem ha ka 6 tarik u Rymphang bad ia kane la pynshisha kaba la pynlong ia ka jingiap jong baroh ban kot sha ka 33 ngut. Ia ka jingwad la pynkut noh ha ka 9 tarik u Rymphang.
Ula ong, ba ia ka jingsiew ia ka ex-gratia kaba kot T.24 lak la dep ban aiti sha ki 8 tylli ki longiing bad ia kiba dang sah ka kam ka dang iaid shakhmat.
“Ki kam ban pyllait ia ka ex-gratia sha ki bahaiing bahasem kiba dang sah, ka dang iaid shakhmat mynta, ha kaba kala don ka jingiakren bad jingiapyntip bad ki bahaiing bahasem ban ioh ia ki jingtip kiba donkam”.
Ka suo-motu FIR kadei kaba la dep ban rejistar bad ka Special Investigation Team kaba la khlieh da u DIG (Eastern Range)la dep ban thaw bad haduh mynta kila don 7 ngut kiba la shah kem.
Nalor kane, 62 tylli ki ejahar halor ka jingtih be-ain, 57 tylli hadien ba kala mih ka jingbthei, sa 5 halor ka jingkhaii be-ain bad 2 tylli ha kaba iadei bad ka jingbthei kaba la pynmih ruh ia ka jingkem ia ki 14 ngut baroh.
Ki bor kiba dei khmih kila dep ban kurup 15,224.72 metric ton u dewiong.
U Myntri Rangbah ula pyntip ba ka District Task Force kaba la khlieh da u Deputy Commissioner kaba kynthup ia u Superintendent of Police, DFO (Territorial), District Transport Officer, District Minning Officer bad kiwei kiwei ki ophisar kala khmih bniah bad peitngor ia katei ka jingjia bad kila shim ia ki sienjam ban tehlakam ia ka jingtih bad jingkhaii be-ain ia u dewiong.
Kine ki kynthup ia ka jingkurup ia u dewiong uba la tih be-ain, ka jingioh ia ki tiar pynbthei, ka jingpynjari ia ka kyndon 163 BNSS, ka jingpynduh ne pynjulor noh ia ki Cranes bad ia ki mashin bad ki kor ki bor ha ki jaka tih ban iada na ka jingsdang biang ia ka jingtih be-ain.
“Ha ka jingtohkit kaba mardor la ioh jingtip ba ka jingbthei ka lah ban dei namar ka jingpyndonkam ia ki tiar pynbthei ha ka jingtih be-ain. Kane ka jingjia kala lam sha ka jingiap jong kiba bun bad ka jingmynsaw bad bun ngut kila sahkut hapoh jong ka par tih dewiong” ula pyntip bad ka iathuh, “Ka jinglong jong ka jaka tih, kynthup ia ka jingbym biang ka jinglong ka khyndew, ka jingtih ia ki thliew shapoh bad ka jingdon ia ki mashin bad ki tiar pynbthei, ka buh ha ka jingma kaba khraw ia kiba sahkut bad kumjuh ruh ia ki kynhun nongleit iarap ban wad ia ki”.
Ka jingmana hapoh jong ka BNSS Section 163 mynta kala treikam ruh ha ki jaka tih, 5 tylli ki kynhun khynra kila treikam bad 6 ngut ki ophisar, 8 ngut ki sub-inspectors bad 4 Platoon ki pulit la phah sha katei ka jaka.
U Sangma ula ong, ba ka District Task Force kala bteng ban iatreilang bad ki bor kiba dei khmih bad ki jingkhynra kiba man la ka sngi ryngkat bad ia ka jingkurup.
Ula ong, hashwa jong katei ka jingjia ruh, ki bor pyniaid District bad ki pulit kila shim ia ki sienjam kiba tyngeh halor ka jingtih dewiong be-ain.
“Ha u snem 2025, kila don baroh 4 tylli ki case kiba la rejistar ha kaba iadei bad ka jingtih dewiong be-ain, ia kaba la lap lyngba ka jingpyndonkam ia ki Drone. La kurup baroh 11,182 MT u dewiong be-ain, kynthup lang ia ki kor ki bor kum ki Cranes bad Generator, kiba la pyndonkam ha kaban tih be-ain ia u dewiong” la bynrap u Myntri Rangbah.
