Shillong, Rymphang 16 : U Myntri Rangbah ka Jylla Conrad K Sangma ula pyntip ba la bthah ia ka Judicial Inquiry Commission ba kan aiti ia ka kaiphod hapoh hynriew bnai halor ka jingtohkit ia ka jingbthei ka par ha Mynsngat-Thangsko, kaba la shim ia ka jingim ki 30 ngut ki briew-bad kumjuh ruh ia ki daw tynrai halor ka jingtih dewiong beain ha Meghalaya.
“Ka Judicial Commission of Inquiry, kat kum ki kyndon treikam kan tohkit shim ia ka jingtohkit ym tang ia ka jingjia kaba jia ha ka 5 tarik Rymphang, 2026 hynrei kan tohkit ruh ia ki daw tynrai jong ka jingtih dewiong beain bad ba kan ai ia ki jingai jingmut, ia kaba, kat kum ka Commission of Inquiry Act, 1952 yn sa wanrah hapoh ka Iingdorbar” ong u Conrad ha ka suo-motu statement ha ka sngi sdang jong ka Dorbar Mang tyngka ka Jylla ha ka sngi Nyngkong.
“….ka Sorkar Jylla kala kut jingmut hok ban pynthikna ba ki jingtih dewong beain bad ka jingshalan beain kin ym long kiba iohleh laitlan” ula kular.
U Myntri Rangbah ula bynrap ba ki bor Sorkar kila shim ia ki sienjam ban pynthikna ba ka “jingiakren ia ka jingtih dewiong da ka jingstad saian ka dei ban don bad ki lai ngut kiba la ioh jingbit ban tih dewiong da ka jingstad saian, lem bad 20 ngut kiba la phah ia ki aplikeshon sha ka Sorkar India, kiba dang don ha ka khep ba sdang jong ka jingbishar ba kin ioh ia ka jingbit”.
Ia ka Judicial Inquiry Commission la thung hapoh ka Commission of Inquiry Act, 1952, bad la pynmih ia ka jingpynbna ha ka 14 tarik Rymphang, ka ban khlieh da u Chief Justice barim ka Uttarakhad bad Telangana High Court lem bad arngut ki dkhot-u Ophisar IPS bala shongthait Bah H Nongpluh bad u Ophisas IAS bala shongthait Bah Peter Dkhar.
Haba kren halor ki kyndon treikam jong ka Commission, u Conrad ula ong ba ka Commission kan tohkit halor ki daw kiba lam sha ka jingjia ba 5 tarik Rymphang 2026 ha ka par dewiong ba don ha Mynsngat-Thangsko, East Jaintia Hills haba bynrap ba kan sa aiti ia ka kaiphod jingshem kaba bniah halor ki jingleh/lane jingbakla jog ki briew/ne borkhmih, kynthup ka jingbym lah ban iada ia ka jingjia ba jia ha ka 5 tarik Rymphang.
“Ka Commission kan shong bisahr ia ki daw tynrai jong ka jingtih dewong beain ha Jylla Meghalaya, kynthup ym ban kut tang ha ka rukom long ka trei ka ktah jong ki nongbylla bad ki nongtih mar kiba shaniah tylli ia ka kamai jakpoh na ka kam tih dewiong” ula ong haba bynrap ba ka Commission kan ai ia ki jingai jingmut ban pynbeit, kynthup ki jingpynkylla ha ka rukom treikam ki bor synshar, ka ban sa pyntreikam da ka Sorkar Meghalaya ban iada ia kum kine ki jingjia hadien habud.
U pyntip ba la bthah ruh ia ka Commission ba kan ai jingmut ia ki sienjam kiba iahap ban shim, kynthup ki song jingiarap pisa lane ka rehabilitation scheme, ia ki briew kiba shaniah ka kamai jakpoh na ka tih dewiong hashuwa ban khang ka NGT bad ban ai jingmut ruh la ka Sorkar ka donkam ban leit iakren ia ka President ka Ri India ba kan pynjynsur/jingpynkylla/ pynlait ia ka jingtreikam jong ki kyndon ka Mines and Mineral Development Act, 1957 lane kino kino ki ain ba lah ban pyntreikam, kiba la mynjur da ka Parliament hapoh ka para 12(A)(b) jong ka Sixth Schedule ka Riti Synshar ka Ri haba khmih ia ka rukom tih dewiong tynrai ba don ha Jylla Meghalaya.
“Ka Commission kan aiti ia ka kaiphod hapoh ka hynriew bnai” ong u CM.
