Shillong, Rymphang 03 : U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem ha ka sngi Nyngkong ula pyntip ba ka Executive Committee ba ialam da ka NPP, ha ka jingtyrwa ban pynkylla ia ka Sixth Schedule ka Riti Synshar ka Ri, kala kyrpad ia ka Sorkar Pdeng ban mynjur ha kaban nang pyniar ia ki jaka riewlum ne Sixth Schedule hapoh ka Jylla.
“Ka KHADC ha ryngkat u Bah PN Syiem bad Bah Titosstarwell Chyne kila pynlong ia ka jingbuddien bad ngi la kyrpad ia ka Sorkar Pdeng halor ka jingdonkam ban nang pyniar ia u pud u sam ki jaka riewlum. Ia mynta, ngi dang don ki jaka Municipal ha Ri-lum Khasi bad Jaintia. Kumta, ngi la tynruh ba kan nym don shuh ka jaka Municipal bad baroh ki dei ban hap noh hapoh ka Sixth Schedule” ong u Bah Pyniaid haba iakren bad ki lad pathai khubor hadien ba dep thep kyrteng kum u kyrtong ka NPP na Nongthymmai constituency.
“Ngi la buh ruh ka jingtyrwa ban pyndam noh ia ka para 12(A) khnang ba kan nym don shuh ka jingiatakhuh hapdeng ka ADC bad ka Sorkar Jylla khamtam eh haba phai sha ki ain” ula bynrap.
U Bah Pyniaid uba dei ruh u Convener ka Confederation of the North East Council ba mihkhmat ia ki 10 tylli ki Autonomous District Council (ADC) ha ka thain Shatei Lam Mihngi, ula pyntop ba ka jingialang ba dang shen hapdeng ki 10 ADC bad u Myntri kam pohiing Amit Shah ka dei kaba sngewtynnad bha.
“U (Amit Shah) la kular ba ia ka 125th Constitutional Amendment lah ban wanrah noh ha kane ka Dorbar Mang Tyngka jong ka Parliament. Lada wanrah, kan dei ka jingjop ia ki paidbah ka Meghalaya bad kiwei ki Jylla ba hap hapoh ka Sixth Schedule namar ha kane ka jingtyrwa ban pynkylla ia ka Sixth Schedule, ki don shibun ki kyndon kiba la buh ban nang pynkhlain ia ki ADC haba phai sha ka khyndew ka shyiap, ka riti dustur bad ka jingioh Direct Funding kat kum ka Article 280 jong ka Finance Commission” ula ong.
Haba kylli, u Bah Pyniaid ula ong ba ka samoi treikam ba mynta jong ka KHADC kala lah ban wanrah ia shibun ki ain tang hapoh ka hynriew snem.
“Nga sngew ba ki dang don shibun ki kam kiba donkam ban leh eiei da ka District Council. Hynrei, ngi la pyrshang ban wanrah ia bun ki ain tang hapoh ka por ba lyngkot ba 6 snem namar la pynkupbor ia ngi ban thaw ain halor ki mat bapher bapher kat kum ki kyndon ka Sixth Schedule ka Riti Synshar ka Ri India “ ula bynrap”.
Ula pyntip ruh ba haduh 6 tylli ki Bill bala mynjur da ka KHADC kala ioh ia ka jingmynjur jong u Lat ha u snem bala lah. Kine ki kynthup ia ka Khasi Hills Autonomous District (Administration of Elaka) (Amendment) Bill, 2023, the KHAD (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship, 2023, the KHAD (Regulation and Administration of Land) Rules, 2023, the United Khasi-Jaintia Hills District Fishery (Amendment) Bill, 2023, the KHAD (Khasi Social Custom of Lineage) (Amendment) Bill, 2023 bad ka KHAD (Trading by Non-Tribals) (Amendment) Rules, 2023.
“Ki jingpyrshang jong ngi ha kine ki 6 snem kila long shisha ki jingkyrkhu ia ki riewlum trai ri trai muluk. Ngi la ioh ia ka Land Act, 2021, ka Amendment of Elaka Administration Act, 2023, kiban ai jingithuh ia ki Seng Kynthei bad Seng Samla ha ki Dorbar Shnong bad ka jingpyniaid Shnong. Kane ka iarap ban iakhun ia ki jingsniew na ka imlang sahlang naba ka Sorkar Jylla marwei hi kan ym lah. Ka Social Custom of Lineage Act, 2023 ruh kala nang pynkhlain ia ka dustur ai jait kmie jong ngi. Ngi la pynkhlain ruh ia ki Kur Khasi. Dang shen, ka kot jong u Bah Raphael Warjri kala iathuh ba ki don palat 5000 ki jait Khasi” ula ong.
