Shillong, Jymmang 16 : Ka Sorkar Jylla kala pyntip ba ym don satia kino kino ki trok kiba kit palat pud ba kin iaid lyngba ki 24 tylli ki weighbridge ba don ha kylleng ka Jylla.
Ka Sorkar kala pyntip ia kane ha ka action taken report ne ka kaiphod halor ki sienjam ba kala leh, kaba la aiti sha ka Iingkashari Meghalaya High Court ha ka 8 tarik Jymmang, ba iadei bad ka PIL bala mudui da u nongtrei mon sngewbha Tennydard M Marak.
Ia kane ka mukotduma la shong bishar ha ka sngi Thohdieng. U Tennydard ha ka mudui, ula kynnoh ia ka jingtrei bym hok na ka liang ki nongtrei ka Sorkar ha kaban pyniaid ia ki 28 tylli ki weighbridge kiba don ha kylleng ka Jylla.
Ka jingujor ka long ba ki kali kit mar ba kit palat pud la shah ba kin iaid khlem da thew, kaba la wanrah ia ka jingduh ia ka khajna, ka jingsiew bad ki kuna sha ka Jylla.
Ha ka hukum, ka Iingkashari ba kynthup ia u Chief Justice IP Mukerji bad Justice W Diengdoh kala ong ba da ki hukum bala leit halor kane ka kam, la bthah ia ka Sorkar ba kan leh ia ka jingtohkit kaba bniah halor kane ka kam da kaba leit jurip ia ki weighbridge ha ka jingiadonlang u nongmudui.
“U nongiasaid ba mihkhmat ia ka Jylla ula aiti ia ka kaiphod ha ka 8 tarik Jymmang, 2025 ba pynpaw ia kiei ki kam kiba la leh halor kane ka kam. Kat kum kane ka kaiphod, ia ka jingjurip la leh ha ki 24 tylli ki weighbridge bad ha kine baroh ki weighbridge, ym shym la lah ia kawei ruh ba trok ba kit palat pud ba kin iaid lyngba ki weighbridge” ong ka hukum.
Hynrei, u Nongiasaid ain jong u nongmudui Dr P Agarwal ula wohdong ia ka kaiphod ba ka dei kaba biang nadong hadong bad u kwah ban file ia ka kaiphod kaba la pynbeit thymmai.
“Ia kum kane ka kaiphod ba pynbeit thymmai lah ban aiti hashuwa ka 6 tarik Jylliew, 2025” ong ka Iingkashari ha ka hukum.
