Nongpoh, Naiwieng 14: Ka National Highway Authority of India (NHAI) kala pyntip ba ka jingmaramot ia ka jingkieng Dwarksuid barim kan shimpor kumba shitaiew eiei katba ka jingshna ia ka jingkieng thymmai kan shimpor kumba 6 bnai.
Ia kane la pyntip da u Project Director ka NHAI Anand Singh Chauhan ha ka jinghiar jurip lang bad u MLA ka Umroi hynne ka sngi nyngkong, ban khmih ia ka jinglong shngain jong kane ka jingkieng ban iaid kali namar ka jingtwa khyndew ba jia hynnin ka Sngi U Blei, kaba la nang pynsynjor ia kane ka jingtei.
Ha kane ka jingjurip la iadonlang u Superintending Engineer ka PWD Bah Ezekial Lyngdoh, u Executive Engineer ka Tnad pWD Umsning Division Bah Rymphang Kharkongor bad kiwei kiwei ki Ophisar ka NHAI.
Haba iakren bad u Project Manager ka NHAI, ula pyntip ba ka jingmaramot ia ka jingjulor jong ka jingkieng Dwar Ksuid kan shimpor hapoh shikatew. Ula ong ba kane ka jingtwa kala jia tang namar ka jingpyntrei ia ka jingkieng thymmai kaba don mar syndah.
U Chauhan u pyntip ba ka jingpyntrei ia ka jingkieng thymmai kala iaid shaid shaid bad la buhpor ban pyndep noh ia ka hapoh ka 6 bnai.
Ha ka jingjurip jong kine ki kynrem ki lyndan la pynshisha ba ka jingtwa khyndew ha ki bynta jong ka Jingkieng rim ka dei namar ka jingtih khyndew ban shna ia ka jingkieng thymmai kaba don harud jong kane hi ka jingkieng, kaba la dep tei nyngkong da ka North Eastern Council (NEC).
Haba kren bad ki Nongthoh Khubor, u Bah George B Lyngdoh u la pynpaw ia ka jingsngewkhia kaba jur halor ka jingsynjor ka jingkieng dwarksuid kaba dei ruh ka jingkieng iaid kali kaba kongsan ha ka jylla Meghalaya kaba pyniasoh ruh sha kiwei kiwei ki jylla. U ula kynnoh ba ka daw baroh hi ka dei tang namar ka jingbym shimkhia ka sorkar jylla ban tei da kaba kham bit bad kaba kham skhem.
U la ong ruh, ba tang hapoh ka Umroi Konstituensi ki don ar tylli ki jingkieng kiba kongsan kiba kynthup ia ka jingkieng Dwarksuid bad kawei pat ka dei ka jingkieng damsite kiba la sdang shong synjor bad buh jingma ia ka iaid ka ieng ki paidbah khamtam ka kit ka bah lyngba ki kali heh bad lada ka sorkar jylla hi kan dang leh matlah halor ka jingdonkam kaba kyrkieh ban shim da ki lad ki lynti kiba kyrkieh, kan sa wan ka apot kaba shyrkhei ia ki paidbah ka jylla kiba pyndonkam ban iaid ban ieng lyngba kine ki jingkieng.
“Ka jingsynjor jong kine ki jingkieng kiba kongsan ka dei hi tang namar ka jingbun ki kali kit mar kiba kit palat palat pud khlem da iahap shuh bad ka jingkyrshan jong kine ki jingkieng bad halor kane kum u nongmihkhmat paidbah u la dep ban kren sha ki bor ka sorkar jylla ba la donkam kyrkieh ban don noh ki jaka ban thew ia ki jingkit mar ki kali khnang ba kin lah ban kit katkum ka jingkhia ba lah ban shan da kine ki jingkieng”, ong u Bah George B Lyngdoh.
