Shillong, Naiwieng 14: Ki Pulit ka East Khasi Hills hynne ka sngi nyngkong, kila pyntip ba kila don haduh 5 ngut ki samla kiba suba donkti ha ka jingshoh briew bad pynjulor ia ki kali ha ka jingiaid rally jong ka seng FKJGP myn ha ka 28 tarik u Risaw.
U Superintendent of Police (SP) ka East Khasi Hills u Bah Sylvester Nongtnger ula iathuh ba ki pulit kila dep ban rejistar 3 tylli ki case halor katei ka jingjia bad haduh mynta la kem ia 5 ngut kiba donkti ha kaban shoh briew bad ban pynjulor iaki kali haka jingiaid rally.
U Bah Nongtnger ula ong, ba ka jingtohkit ka dang iaid shakhmat halor katei ka jingjia.
Katba na ka liang u Superintendent of Police (SP) City u Bah Vivek Syiem ula pyntip ba ki Pulit mynta kila dep khot hajir ki Nongialam ka FKJGP ban kylli jingkylli halor kaei kaba jia na ka rally jong ka seng.
“Ngi la ioh iaka jingiatreilang na ki nongialam ka FKJGP bad ka jingtohkit mynta ka dang iaid shakhmat” ula ong.
Halor ka jingkynnoh ba ki pulit kila pyndik bad bat bun kynta ban kylli jingkylli iaki nongialam ka FKJGP, u Bah Vivek ula ong, ba kam shim la don kano kano ka jingpyndik ia ki nongialam ka FKJGP hynrei la shu kylli jingkylli beit iaki bad ym shim la bat ruh da bun kynta iaki.
