Shillong, Nohprah 11: Ka Iingkashari Meghalaya High Court ha ka sngi Balang, kala hukum ban pyndep noh ia ka jingmaramot ia ka bynta ba 45 na ka 102/225 km jong ka surok National Highway (NH-06) hapdeng ka Jowai bad Ratacherra.
Na kane ka bynta jong ka surok, 5 km ka dei kaba la jubor bha ka jingsniew.
Ka Iingkashari, ha ka 6 tarik Naiwieng, kala hukum ia ka National Highway Authority of India (NHAI) ban maramot kyrkieh noh ia kane ka surok ba 5 km khnang ba kan pynaram ia ka leit ka wan ki kali.
Ha ka sngi Balang, ka NHAI kala pyntip sha Iingkashari ba haba pyntreikam ia ka hukum ka Iingashari, ka kompani kala maramot kyrkieh ia kane ka surok ba 5 km bad kular ban pyndep ia ki kam bas ah hapoh u Lber 2025.
U K Khan, AAG ba mihkhmat ia ka Jylla, ula pyntip ba ka Sorkar kala ai ia baroh ki jingiarap sha ka NHAI ban pynthikna ia ka jingiaid beit jong ki kali hapdeng ka jingmaramot ia ka surok.
Hadien ba shong bisahr ia ka PIL bala mudui da u Advocate Kynjaimon Amse (Bam Kwai ha Dwar U Blei), ka Iingkashari ba kynthup ia u Chief Justice IP Mukerji bad Justice B Bhattacharjee kala ong “Halor kine kiei kiei, ngi bthah ia u S Panthi, Amicus Curiae ban leit jurup ia kane ka surok sniew ba 5 km bad ai ia ka kaiphod ba lyngkot hashuwa ka jingwan rah biang ia ka mukotduma sha Iingkashari haba iadei bad ka jingpyntip u S Sengupta (nongiasaid ka NHAI) ba ka jingmaramot ia kane ka bynta jong ka surok ka dei kaba la dep”.
“Ngi bthah ruh ba ka jingmaramot ia kaba bynta ba sah jong ka 45 Km ka dei ban bteng ha kaban pyndep noh kumba la kular da u S Sengupta. Ka Sorkar Jylla ka dei ban ai ia baroh ki jingkyrshan sha ka NHAI ban lah pyniaid beit ia ki kali ha ka por ba iaid ka jingmaramot” kala ong.
Ka Iingkashari kala buh ban shong bishar biang ia kane ka mukotduma ha ka 5 tarik u Rymphang, 2025.
