Shillong Jylliew 19: Ka MLA jongka Sutnga Saipung Kong Santa Mary Shylla hynne ka sngi Balang, kala pyntip baka sorkar kala pynioh iaka bhah tyngka ba T.230 Klur ban shna iaka surok National Highway-06 ha East Jaintia Hills bad kala kyrpad ia ki paidbah ba kin long kiba iai shah katto katne por namar ka jingbym ailad ka mariang.
“Ka jingsniew jong ka surok NH-6 kam dei ba ka sniew tang mynta hynrei la bun bun snem bad ka daw ka long ba la bun palat ki kali bad ka ba-ar kadei ka jingbym ailad ka mariang ia kaba ym lah ban leh eiei” ong ka Kong Santa.
Kat kum ka jingong jong ka“Ka sorkar kala khot ia ka tender bad la ioh ia u kontraktor ban pynshna ia kane ka surok ha ka jingmang pisa ba kot T.230 Klur”.
“Ka jingtrei kala iaid mynta bad ka Sorkar kala peitngor bha ia ka kam” kala pyntip.
Kane ka Nongmihkhmat ka thain kala kyntu ia ki kynhun kiba pynlong ia ka jingiakhih ba kin long kiba iai shah katto katne por bad ban sngewthuh ba u contractor um pat lah satia ban pyntrei ia ka surok namar ka jingther u slap.
