Shillong, Nailar 24: U Chief Executive Member (CEM) ka Khasi Hills Autonomous District Council (KHADC) bah Pyniaid Sing Syiem bad ka Executive Member (EM) ba khmih iaka Trade kong Grace Kharpuri hynne ka sngi ula lum ka jingialang bad ki nongialam bad dkhot ka Hills Farmers Union (HFU) ban iakren halor ka Establishment, Management & Control of Markets Regulation Act 2021 kaba dang shu ioh jingmynjur na Lat ka jylla u Phagu Chauhan.
Haba kren ha kane ka sngi ka EM ba khmih iaka Trade kong Grace Kharpuri kala ong ba kane ka Act kan long ka jingkyrkhu iaki nongrep namar kan pynduh pyndam noh iaka jignshah ot kilo ki mar rep ha ki nongkhaii.
Ka kong Grace kala ong ruh ba ka Executive Committee jong ka KHADC baroh kawei hapoh ka jingialam jong u CEM ka sngewhun namar kane ka Act kan wanrah ka jingmyntoi iaki bun balang ym tang iaki nongrep hynrei wat iaki nongkhaii ruh.
“Kaba sah mynta ka long sa tang ban pyntyllun noh ia ka kam shakhmat kata ban thaw iaki Rules bad hadien bala thaw iaki Rules ka EC kan pyntreikam noh ia kane ka ain ban pyrkhing iaka jingshah khnoit beain ki nongrep ha ki iew” la ong ka kong Grace.
Ka kong Grace kala ong ba kane ka Act ym tang kan pynduh iaka jingshah ot kilo ki mar rep hynrei kan peit ruh iaka dor jong ki mar rep daka ba pyntreikam iaka Minimum Support Price (MSP).
Naka liang u president ka HFU u bah Commander Shangpliang ula ong ba ka seng bad ki nongrep ki pynpaw ruh ka jingkhmih lynti ba katei ka aiñ ïew kan iarap ia ki nongrep haba ki leit ban die ia ki mar rep jong ki nangne shakhmat.
U bah Commander ula ong ba baroh shi katta ka jingiai ud jongngi ki nongrep ka long ban pynduh noh ia kane ka jingot kilo hynrei haba ym don ka aiñ kaba biang ka long ka jingeh ban pyntreikam.
“Nga kwah ban pynpaw ba kane ka ain kam dei ka ain ban pyniashrut hapdeng ki nongrep bad ki nongkhaii hynrei kadei ka ain ban wanrah ka jingmyntoi lang ia baroh daka ba iatreilang bad naka liang ka HFU ka ai khublei kyrpang ia u CEM bad EM ka tnad Market” la ong u bah u bah Commander.
Hashwa kane ki nongialam ka HFU ha ryngkat bad ki jhur ha ki kriah ki la leit ban kynduh ia u CEM ka KHADC u bah Pyniaid Sing Syiem kumjuh ia ka Executive Member (EM) Market ka kong Grace Kharpuri bad ia u CEM barim u bah Titosstarwell Chyne ban pynpaw ka jingsngewnguh haba iadei bad ka Market Act, kaba u Lat u la mynjur dang shen.
Pule lang ia kane: Mynjur ki Trai Shnong ban pynheh ka Topcem ia ka karkhana hapdeng ka jingpyrshah
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
