Shillong, Naitung 28 : Ka jingmih jong u MDC ka Mawkynrew, Bah Martle Mukhim ban pynbna ba ma u ruh un aireng lang ha ka elekshon MLA kaban long ha u 2023 ka la nang pynshong shit shuh shuh ia katei ka constituency kaba la don lypa mynta haduh lai ngut ki kyrtong kiba la dep ban pyntikna ba kin iakhun beit.
Ki lai ngut ki kyrtong kiba la dep ban pyntikna ba kin iakhun ki kynthup ia u Bah Banteidor Lyngdoh ba dei ruh u MLA ba mynta bad Myntri ka tnad Agriculture ka sorkar jylla na ka PDF, Bah Remington Pyngrope MLA barim na ka UDP bad u Bah Kansing Lynshiang na ka party Congress.
Haba ioh ban iakren bad u Bah Martle u la ong ba ka rai ba u shim ban iakhun biang ha ka elekshon MLA kadei na ki dak ba ki paidbah ki pynpaw ha ka elekshon MDC 2019 kaba pyni ba ki kwah ba un don biang ha ka sainpyrthei.
“Shwa ka elekshon MDC ki nongkyrshan jong nga ki la ong lypa ba lada nga jop ia ka MDC nga hap ruh ban iakhun ia ka elekshon MLA bad kumta kane ka rai ka neh” ong u Bah Martle uba la bat teng ruh ia ka shuki Myntri Sorkar ha ka sorkar Meghalaya ha ki snem ba la dep.
U Bah Martle u ong ruh ba ka jingiakhun ia ka elekshon ha Mawkynrew ka pher bha namar ki nongshong shnong ha katei ka constituency ki dei kiba dang shida bad kiba dang lui lui bad khuid jingmut.
U la pynpaw ruh ba um don satia ka jingtieng ia ka bor pisa lane ka jingpynbiej shwa ka elekshon namar u la iohi markhmat ia ka jubab kaba ki paidbah ki ai ha ka elekshon MDC. “Ka jingieid bad ka jingshaniah ba ki paidbah ki ai ianga ha ka elekshon MDC da kaba pynjop ka la pynpaw shai kdar.”
Shuh shuh u la pyntikna ruh ba ha kane ka elekshon MLA ruh un iakhun beit na ka party HSPDP ka, party kaba ki paidbah ki pynjop ha ka elekshon MDC.
