Shillong, Nailar 06 : U Myntri ka Tnad Arts & Culture Bah Paul Lyngdoh ula pynthikna ia ka jingshah pynpra u mot sah jingkynmaw jong u Khla wait ka Ri-lum Khasi Tirot Sing Syiem, uba pynieng ha phyllaw ka Indira Gandhi Cultural Centre ha Dhaka.
Une u mot u dei uba dang shu plie ha ka 16 tarik Rymphang hynrei ula shah pynpra ha ki kynhun nongiakhih ka Ri Bangladesh-kaba don mynta hapdeng ka jingiaumsnam- kiba la thang dusmon ruh ia ka Indira Gandhi Cultural Centre.
Haba kylli, u Bah Paul ula ong “Nga dang shu iohi ia ka video bala phah da uwei u nongpathai khubor kaba pyni ia ka jing shah pynpra dusmon ka IGCC bad ruh u mot jong u Tirot Sing Syiem”.
“Ngi dang shu iohi bad dang shu dep peit ia ka video dang 5 minit eiei bad kaei kaba paw ka long ba ka don ka jingiakhih pyrshah ia ka Ri India ha kane ka Ri bad ha kane ka jingiakhih, kila hiar thma ia ka Indian High Commission Cultural Centre. Naba une u mot sahnam la pynieng ha phyllaw ka Centre, kumta ula shah dusmon lang ha kine ki kynhun” ong u Bah Paul.
“Kat kum ka video, nga tharai u mot ula shah pynpra phom hynrei tang u maw thoh kyrteng jong u Tirot Sing u dang don kumba u long” ula bynrap.
