Shillong, Nailar 06 : Ka Bharatiya Janata Party (BJP) Meghalaya, kala pynrem jur ia ka jingleh riewkhlaw jong ki shitniam Muslim ha Bangladesh, kiba la pynpra dusmon ia u mot sahnam jong u Khla Wait ka Ri-lum Khasi, u Tirot Sing Syiem, uba pynieng ha phyllaw ka Indira Gandhi Cultural Centre, Dhaka.
“Ka State BJP kala shimkhia bha ia kane ka jingleh dusmon kaba niewbein ia ka jingkynmaw burom ia une u riewshlur bad ka jingsngew jong baroh ki Jaidbynriew ka Jylla jong ngi bad ka Ri” ong u Nongaiktien ka BJP Bah Mariahom Kharkrang.
Kat kum ka jingong jong u “Ki dur kiba wan na Bangladesh kila pynkyndit ia kino kino ki briew kiba la shai, ha kano kano ka sla pyrthei. Ka jingpynpra ia u mot Tirot Sing bad kumjuh ka jinghiar thma ia ki rit paidbah bad ki jaka mane Blei ha Bangladesh ka dei ka bym lah ban pdiang bad kala pynsngewsih kthang ia ngi. Ngi duwai ba ka bor jingsngewthuh kan ieng rasong bad ka jingsuk kan wanphai noh mar mar”.
Ka BJP Meghalaya kala kyrpad ruh ia ka Sorkar Pdeng ba kan iakren ia kane ka kam bad kino kino kiba bat ia u lakam ka jingsynshar ia mynta, ha kane ka Ri ba marjan, khnang ban pynthikna ia ka jingiada ia kum kine ki jingtei sah kynmaw bad ban pynkut noh ia ki kam umsnam pyrshah ia ki rit paid ha Bangladesh.
