SHILLONG, JAN 27: U Symbud Myntri Rangbah ka jylla uba khmih ruh ia ka tnad Urban Affairs u Bah Sniawbhalang Dhar, hynne ka sngi ula pynthikna ba ka sorkar jylla kan kynthup lut ia baroh kiba donbynta lang ha ka kam ha ka jingshim ia kano kano ka rai.
Kane kaj ingkren ka jongu, kadei hadien ba ka Meghalaya & Greater Shillong Progressive Hawkers & Street Vendors Association (MGSPHSVA) kala byrngem ban pynlong da ka jingiakhih lada ka Provisional Town Vending Committee (PTVC) ka pulom ha kaban lum kyrkieh ia ka jingialang.
Ka Synjuk jong ki nongdie madan kala dawa ruh ba dei ban weng noh mardor ia ka jingpynbna paidbah bad ban pynduh pyndam noh baroh ki kam kiba la leh da ka PTVC, ia kaba kila kynnoh ba kadei ka kynhun kaba be-ain nalor ka jingsdang ia ki kam jongka jingkam bad jingpyrshah (claims and objections) bad ka jingthaw ia ka thup kyrteng jongki nongdie madan kiba dei ban ioh ia ka syrnod die jingdie.
Katkum ka jingpynpaw ka jong ki, kane ka thup kyrteng jong ki nongdie madan kiba dei hok kidei ban jied ia ki nongmihkhmat ki jongki sha ka TVC namar la kren shai ha ka shithi kaba haka 13 tarik u Nohprah 2022 ban thaw ia ka TVC kum ka kynhun kaban leh ia ka jingsorjamin bad ban khmih ia ki jingkam bad jingpyrshah bad kiwei kiwei.
“Kiei kiei kiba ngi leh, ngin sa leh katkum ki kyndon jong ka ain. Ngin pyrshang ban kynthup lang ia baroh ha ka jingshim rai” la ong u Bah Dhar.
“Hooid, lada ki don kino kino ki jyrwit jyrwat, ngin ia pynbeit lang ia katei, ki lah ban don ki mat ha ki katto katne ki jaka bad wat ia katei ruh, ngi long kiba kloi ban iapynbeit hangne hangtai” ula bynrap.
U Bah Sniawbhalang ula ong, “Ka jingkhang jong ka sorkar ka long beit kaba plie naka bynta ban shong jingialang bad kiba iadonbynta lang ha ka kam hynrei ka jingmut jong ka sorkar hi ka long ba ka kwah ban pynkynriah ia ki katto katne ki jaka kiba kongsan na ka bynta ka bha ka miat jong ka sor bad naka bynta ka bit ka biang jong ka leit ka wan jong ki paidbah”.
“Hooid, lada ka don kano kano ka jingpyrshah na ka liang ka jongki, ngin sa pynlong ia ka jingiasyllok bad ki nongdie madan. Ngi long kiba kloi ban pdiang ia ki bad kam don satia kano kano ka jingeh ban iakynduh bad ban iakren bad ki” ula bynrap.
