Pynthikna u DGP ban tehlakam ki Pulit ia jingtih bad khaii beain ia u dewiong ha Jylla kumba bthah ka Iingkashari

Date:

Share post:

Shillong Jymmang 16: U Director General of Police (DGP) ka jylla u Dr LR Bishnoi hynne ka sngi Baar, ula pynthikna ba ki pulit ka jylla kin pyrkhing bha katkum ka hukum ka iingkashari ban tehlakam iaka jingtih bad jingkhaii be-aiñ ia u dewiong haka jylla.

Kane kala mih, tang hadien ba ka Meghalaya High Court kala pynmih ia ka hukum kala pan ia ka jingpynshai balei ba ym dei ban pynshitom ia u Chief Secretary bad ia u Director-General of Police ka jylla halor ka jingbym lah ka jongki ban shimkhia ha kaban tehlakam iaka jingtih bad jingkhaii be-aiñ ia u dewiong ha poh ka jylla.

U Bishnoi ula ong, “Ngi dang shu ioh ia ka hukum bad ngam pat ioh pule lut ia katei ka hukum. Ngin sa khmih bniah ia katei ka hukum bad ngin sa phah iaka affidavit ha ka por kaba biang” bad ka ong, “Ka high court ha ka jingpynmih ia ka hukum kala ai jingmut ia ki katto katne ki sienjam, kumta ngin sa bud ryntih thikna katkum ka hukum jong ka high court.”

Ha ka Lah Sngi u Blei, ka Full Bench kaba kynthup ia u Chief Justice Sanjib Bannerjee, Justice HS Thangkhiew bad u Justice Wanlura Diengdoh kila bthah ia u chief secretary bad u director general of police ban phah iaka “Personal Affidavit” ka jongki ban jubab halor ka jingshem kaba la kdew haka 13th Interim Report jongu Justice Katakey uba khlieh iaka National Green Tribunal ha ka jingtohkit iaka jingtih bad jingkhaii dewiong be-aiñ ha Meghalaya.

Katkum ka 13th Interim Report, u Justice Katakey yn hap ban wad ia ki jingtip kiba bniah da kaba leit jurip ia ki jaka kiba don ha Shallang bad Kyllonmathei, West Khasi Hills district ha ka 10 tarik u Jymmang, 2023, bad la shem iaka jingshisha ba bun ki karkhana Coke kila treikam pura ha katei ka thain khlem da burom ia ki aiñ ki kanun.

“La lap ha katei ka jingjurip ia ki jaka ba bun tylli ki karkhana Coke kiba la seng kim shym la don satia ia ka jingioh jingbit ban seng ne ban sdang iaka jingtreikam na ka Meghalaya State Pollution Control Board,” la pynpaw ha ka kaiphod.

Nalor kane ka High Court kala shem ba haka 13th interim report la kdew ba kala don ka jinglum thup ia bun bah u dewiong ha kylleng ki bynta jong ka thaiñ Shallang bad Kyllonmathei.

“La shem ba ki don ar tylli ki jaka kiba lum thup khyndiat ia u dewiong habar jong ka kynroh maw jongka Shallang Police Station. Ha ka bynta ba don ka surokbah No.127B bad hapoh 2 Kilometres jongka Shallang Police Station, la shem ia ka jinglum ia u dewiong ba la tap da ki plastic. Katkum ka kaiphod, la shem ruh ia ki ar tylli ki trok kiba don ia u dewiong, kawei kaba don ia u nombar ML 05-K-0917 bad kawei ka bym don ia u nombar. Ka kaiphod kala kdew ruh ia ka jingshisha bad lyngba katei ka jingjurip ha ka 10 tarik u Jymmang 2023, ym shim la don kano kano ka jinglum thup ia u dewiong lait na ka jingdon u dewiong ha ka Depot number 9, kaba dei ka depot kaba la ioh iaka jingithuh bad la shem ba u don bun bah u dewiong ha kylleng katei ka jaka uba dei uba la shu tih be-ain bad ba la khaii be-aiñ”.

“La shem ruh ba kam shym la don kano kano ka jingpynshitom na ki bor sorkar ne ki bor pulit ne kino kino ki bor hapoh ka Mines and Mineral (Development and Regulation) Act, 1957 ha kaba iadei bad ka jinglum thup be-ain ia u dewiong bad ban kit ia u dewiong uba la don bun bah bad kam shym la don ruh kawei ka kes kaban rejistar pyrshah bad kam shym la don ruh kano kano ka jingujor” la pynpaw ka iingkashari iaka jingsngewkhia.

Katkum u Justice Katakey, “Ka mshym la don kano kano ka jingpyrshang na ka liang ki pulit ne ki bor sorkar ban wad ia u trai jong u dewiong, u trai jaka ia kaba la lum thup ia u dewiong bad u briew uba la kit ia utei u dewiong bad kam shym la don kano kano ka jingpynshitom ia ki ar tylli ki trok kit dewiong bad ym shim la rejistar kes ruh hapoh Shallang Police Station”.

Ka kaiphod kala pynpaw ruh ba ka don ka jingsuba jur ba ka don ka jingshalan be-aiñ ia u dewiong uba la tih na Kyllonmathei sha ki karkhana Coke kiba don ha katei ka thain.

Ka kaiphod kala pynpaw “Ba ka jingdon bun bah u dewiong hajan ka Shallang Police Station bad uba iohi kyndiang na surok, ka long kaei kaei kaba ym lah ban kam bym iohi ne bym don jingtip jong ki bor sorkar ne pulit iaka jinglum thup ia u dewiong ha katei ka thain.

“Ka jingnud ka kynhun ki runar (MAFIA) ban pynkit bad ban lum thup bun bah u dewiong hapoh 2 kilomitar jongka Shallang Police Station bad ka jingbym leh eiei halor u dewiong ka pynpaw ia ka rukom trei jong ki tnad kiba dei khmih ha kaban pynsangeh iaka jingtih be-ain ia u dewiong. Kum kitei ki kam be-aiñ bad ka jingbym shimkhia da ki ophisar ka pyni ba ki donkti lang ne kadei ka jingioh jingkyrkhu na ki briew kiba don ha ka bor ha kaban pyniaid shakhmat ia ki kam tih dewiong be-aiñ bad ka paw ruh ba ki bor kiba dei khmih bad ki pulit kila shu kylla long tang ki nongpeitkai kiba jar jar ia ka jingtih be-aiñ ia u dewiong”.

Hadien ka jingshem ba kala don ka jingpyntip sha ki heh ophisar ka jylla, iaka jingtih bad jingkhaii be-ain ia u dewiong, kynthup ia ki pulit bad ki bor pyniaid sorkar, ka iingkahsari kala pynkynmaw da kaba tyngeh, “Kum kitei ki ophisar ki lah ban leh bha da kaba phai biang sha ka hokum kaba la pynmih da ka National Green Tribunal bad ia ka hukum kaba la pynmih da ka Supreme Court kaba la mana bad khang tyngeh ban tih dewiong be-aiñ”.

“Kane ka long kaba kongsan bha, khamtam haba ka jylla ka don ia ka jingthmu ban stad noh iaka scientific mining bad kan long kaei kaei kaba ym don nongrim bad ka bym don jingmut ba ka kynhun ki briew kan hap ban sdang iaka jingtih dewiong ha ka lynti kaba pyrkhing, da ka jingstad saian hadien ba la dep ban siew ia ka bai lisen bad ia ka khajna, katba kiwei pat ki ioh jingbit ban tih be-aiñ ia u dewiong khlem da pan jingbit ne ban siew ia kano kano ka khajna sha ka jylla na ka bynta katei ka kam”.

Ha kawei pat ka liang, Dr. N. Mozika uba la mihkhmat na ka bynta ka Union ula aiti ba kam shym la don kano kano ka jingbthah ha kaba iadei bad ka jingdon jong ki Pulit ka sorkar pdeng ban shim ia ka bynta ban tehlakam iaka jingkhaii be-aiñ ne jingtih be-aiñ ia u dewiong ha ka jylla.

Ka iingkashari kala buh tarik ban shong bishar biang ia kane ka kam ha ka 23 tarik u Jymmang 2023.

Share post:

spot_img

Popular

More like this
Related

Kyntu u CM ia ki Ophisar MCS ba thymmai ban buh ia u paidbah hakhmat haba ai jingshakri

Shillong, Rymphang 25 : U Myntri Rangbah ka jylla...

Shillong Premier League | Iai bteng ka Mawlai ban khur ia ka nam jop | Nang jan sha ka nam Champion

Shillong, Rymphang 25: Ka Mawlai SC kala nang jam...

‘Question to investigate USTM does not arise’; Rakkam refuse to comment on Haque’s arrest

Shillong, Feb 25: Education Minister Rakkam A Sangma today...

KHADC outcome will not affect NPP’s prospect in GHADC: Rakkam

Shillong, Feb 25: Education Minister and NPP leader Rakkam...