Shillong, Nailur 23: U Director General of Police (DGP) Dr LR Bishnoi hynne ka sngi Thohdieng ula pynthikna ba ka Tnad kan sa leh ia kaba donkam pyrshah iaki ophisar bad ki pulit jongka Tactical Team-I, shisien bala ioh pdiang iaka jingai jingpynshai.
Ka Tactical Team-I kala leit ban khynra iaka iingsah jong u General Secretary barim ka HNLC u Bah Cheristerfield Thangkhiew bad shim syndon iaka jingim jongu haka 13 tarik u Nailar 2021.
“Ngin sa pan jingpynshai na baroh ki ophisar bad ki pulit jongka Tactical Team-I bad ynda la ioh iaka jingpynshai ngin sa leh ia kaei kaba donkam” ong u Dr Bishnoi haba iakren bad ki nongthoh khubor.
Ka sorkar kala shim ia katei ka rai, hadien ba kala iohpdiang ia ka kaiphod jongka Commission of Inquiry kaba la khlieh marwei da u Justice T Vaiphei ia kaba la rah ruh ha ka Dorbar Synrai kaba dang shu dep.
Katei ka kaiphod kala kdew baka jingpynkhreh iaka jingkhynra ka long kaba biang bha, hynrei ka rukom pyntreikam pat ka long kaba don jingduna bad jingbakla, namar katei ka kynhun kadei ban leit kem im ia u Bah Thangkhiew.
