Shillong, K’lyngkot 15 : U Myntri Rangbah ka Jylla Conrad K Sangma ha ka sngi Balang, ula pynpaw ba ka Jylla Meghalaya ka long kaba la pynkhreh nadong hadong ban pynlong ia ka National Games 2027.
U Myntri Rangbah ula pynpaw ia kane ha ka jingialang bad ka President ka Indian Olympic Association (IOA) P.T. Usha lyngba ka video conference ha ka jingiadonlang ki Heh jong ka Meghalaya Olympic Association.
Ha kane ka jingialang, u Myntri Rangbah ula batai ia ka President ka IOA halor ki jinglong ba kloi bad ki jingpynkhreh jong ka Jylla ban pynlong ia ka 39th National Games ha u 2027.
U Myntri Rangbah ula pyntip ba ha kine ki saw snem, ka Jylla kala kynshew laki laka ha ka jingshna ia ki madan, kyntiew kyrdan ia ka JN Sports Complex ha Shillong, Wahiajer Stadium ha Jaintia Hills bad ka PA Sangma Integrated Sports Complex ha Tura nalor kiwei kiwei ki jaka ialehkai.
Ula pyntip ruh ba ka Shillong kala lah ban pynlong ia ka North East Games kaba jop ha u 2022, ka South Asian Games ha u 2016 bad ha kine ki lai snem, kala lah ban pyniaid man u snem ia ka Meghalaya Games.
U Commissioner Sports & Youth Affairs Dr D Vijay Kumar ula pyntip ba ka Jylla kala iasoi ia ka soskular bad ka IOA ha u 2018, kaba ong ba ka Shillong kan dei ka host city (ka sor ban pynlong ia ka Games) bad artylli kiwei pat ki sor kata ka Tura bad Jowai kin pynlong ia kiwei pat ki sports discipline jong ka National Games.
Ka President ka IOA kala pynpaw ba ka Association ka dang bishar ban ai ia kane ka lad sha ka Meghalaya ba kan pynlong ia kane ka lympung ialehkai baheh duh jong ka Ri.
Mynta u snem, kane ka lympung kan long ha Uttarakhand bad u 2026, ka National Games kan ym long satia namar ka India kan pynlong ia ka Asian Games ha u snem ban wan.
