Ba kynnoh pyndonkam bakla u Pulit MPS ia ka bor
Shillong, Nailar 30: U Myntri Rangbah ka jylla Conrad K Sangma hynne ka sngi, u la ong ba ka sorkar kan ym riej ban thung iaka kynhun tohkit halor ka jingkynnoh ba ka don ka jingpyndonkam bakla ia ki 29 tylli ki kali da u Assistant Inspector General of Police (A) GK Iangrai, lada ka wan ka jingai jingmut naka tnad Pulit.
U Conrad K Sangma u la ong, ba ka sorkar kam ju kyntait ban thung ia ka kynhun tohkit ne Commissions.
“Ai ba ki kam kin iaid shwa shakhmat, kano kano ka jingtohkit kaba dei ban leh, ngin ym kiar na kata, kumta kam don kano kano ka jingeh halor katei bad ngin leh ia kaei kaba dei ban leh” ong u Myntri Rangbah bad ka bynrap, “Lada ka don kano kano ka jingbakla kaba la jia, ngin hap ban iaid shakhmat ban phah tohkit halor katei ka jingjia”.
Ula pynthikna ba ka sorkar kan sa leh ia kaba donkam katkum ka jingai jingmut jong ka tnad Kam Pohiing bad ki heh ophisar.
U Myntri Rangbah u la ong, kam long kaba dei bad kaba iahap ban shu pynpoi beit sha kaba kut ia katei ka kam.
“Nga thrai kam long kaba dei ban shu pynpoi noh sha kaba kut ia katei, da kaba shu ong, ba ka don ka jingleh thok (scam). Kaei kaba nga mut ban ong, ka long ba ki don ki bynta kiba lah ban kam ba don ka jingleh thok, hato ki lah pyndonkam bakla iaka pisa u paidbah ne kala don kano kano ka ishu halor katei, nga thrai ia kiei kiei baroh dei ban pule bad khmih bniah bha” ong u Conrad.
“Katkum ka jingpeit ia kiei kiei kiba la jia, ka paw ba ki don katto katne ki ishu kiba sngewkhia ha kaba iadei bad ka jingmang kaba la jia, ki jingpynslem, ka jingpyndonkam ne ka jingpyndonkam bakla ia ki katto katne ki bynta, hynrei kumba kapaw hi, ka rukom pyniaid ka paw kumba ka biang” ong u Conrad.
“Ka tnad kala iaid shakhmat bad ka jingtohkit, kin sa tih bniah halor ki jingtip bapher bad kin sa pynmih iaka kaiphod katkum ka jingai jingmut jong ka tnad Kam Pohiing bad ki heh ophisar. Ngin sa shimkhia bad ban leh da kaba tyngeh halor katei” u la ong shuh shuh.
Katkum ka kaiphod jong ka fact finding team jong ki pulit kaba la khlieh da u Inspector General of Police (Law and Order) u MK Singh la kynnoh ba kila don
29 tylli ki kali kidei kiba la pyndonkam shimet da u AIG (Administration) Bah GK Iangrai MPS khlem da ioh jingbit na ki bor kiba dei khmih.
Nalor kane, ki kali ki kynthup ia kawei ka kali Scorpio bathymmai, kawei ka Bolero thymmai, 2 tylli ki Swift Desire bathymmai bad 2 tylli thuk thuk Bajaj kiba thymmai ia kaba ym shym la ioh ia u registration number namar ka jingbym ai ia kikot ki sla da u AIG (A) bad bun na kitei kim don ruh iaka BS VI Standard bad kumta ym shim la iaid katkum ki jingbthah jong ka Ministry of Road Transport & Highway jong ka sorkar pdeng, kaba paw tyngkrein ba kadei ka jingpynkhein ia ki kyndon.
Nalor kane, haduh 8 tylli ki thuk thuk Bajaj Pulsar 150cc kiba la thied ha u snem 2019 ym shim la ioh ban rejistar namar ka jingbym don ia ki kot ki sla bad kawei ka kali Hyundai Verna kaba la pynieng ha Central Workshop la pyndait da u number thok bad ym shim la rejistar ia katei ka kali da u AIG (A) namar ka jingbym don ia ki kot ki sla.
“Ia kitei ki kali ki bym don iaka registration la pyndonkam naka bynta ka kam shimet ialade khlem da ioh iaka jingbit naka Police Headquarters. Ym shim la don kano kano ka jingkyntiew haka Log Book ia kitei ki kali watla iaka POL/DOL la ai hi da u AIG man la ka sngi” la pynpaw ka kaiphod.
Ka kaiphod kala pynpaw ba ka rukom leh u AIG (A) halor kitei ki kam baroh, ka paw ba ula iaid palat pud iaka kam kumba u dei ban trei ne leh bad katei ka jingle ka jongu kam long kaba iahap satia kum u ophisar.
Ka Fact Finding Team kala ai jingmut iaka jingdonkam ban thung iaka Departmental Enquiry pyrshah ia utei u ophisar pulit uba la leh tam bad ban pynsajia katkum ki kam kiba ula leh.
