Shillong, Nailar 19 : U Myntri Rangbah ka Jylla Conrad K Sangma ha ka sngi Nyngkong, ula pynthikna ba kan nym pat don satia ka jingbujli ia ki Myntri Sorkar ia mynta.
“Em, ym pat don ia mynta. Ngi don beit kumne kumba long mynta bad ngin iai bteng ban trei kumba ngi don mynta” ong u Conrad haba iakren bad ki nongthoh khubor.
Kane ka jingkren jong u kala pynkut syndon ia ki jingiamutdur ba kan don ka jingweng noh ia uwei na ki arngut ki Myntri Sorkar na ka United Democratic Party (UDP) hadien ka jingwan iasoh ki lai ngut ki MLA ka Congress sha ka NPP.
Ka NPP kala ioh ia ka absolute majority da ka jingnang kiew ka jingdon MLA na ka 28 sha ka 31 ngut hadien ka jingwan iasoh ki MLA ka congress.
Ki khubor kila kynnoh ba u Myntri Rangbah ula kular ban ai shuki Myntri ia uwei na kine ki laingut ki MLA.
Hynrei, u Conrad ula pyntip ba kine ki laingut ki MLA ka Congress kila wan iasoh sha ka NPP khlem kano kano ka jingbuh kyndon hynrei ka rai jong ki ka dei kaba la shim beit tang halor ka nongrim jong ki kam pynroi ban ai sha ki constituency jong ki.
