Shillong, Nailar 19: Ka Sorkar Jylla hynne ka sngi Nyngkong, kala sam ia ki Mobile Tablet sha ki Nongtrei ASHA bad ki ASHA Facilitator kiba hap hapoh ka Amlarem Civil Sub-division West Jaintia Hills.
Ka jingsam ia kine ki Tablet ka dei naka bynta ban kyntiew ia ki jingshakri ha ka koit ka khiah lyngba ki kor digital, kaba la sam ha ka prokram Aspiration Block kaba long ha Amlarem C&RD Block, West Jaintia Hills District.
Haba kren ha kane ka sngi, u MLA ka Amlarem uba dei ruh u Chief Adviser jong ka Sorkar Meghalaya Bah Lahkmen Rymbui u la ban jur ïa ka jingdonkam kaba khraw ban leit phah peit bniah lane eksamin ïa ka koit ka khiah man ka por.
U Bah Lahkmen ula kdew ba bun ki nongshong shnong hapoh ka thain ki leh klet ban phah peit bniah lane eksamin iala ka koit ka khiah bad kane ka wanrah ka jingkiew ha ka jingdon kiba ioh pang bapher bapher kum ka jingpang shini, stroke, BP bad kiwei kiwei.
U MLA ula batai ba ka jingbym lah ban lap kloi bad ka jingslem ban shim iaki lad jingiada na ka jingpang ka wanrah ia ki jingeh ha ka koit ka khiah.
Haba iadei bad kane u Bah Lahkmen u kyntu ia ki paidbah ba kin kham shimkhia ban leit phah eksamin haba ki sngew pher ha ka met khnang ban pynthikna ba kin don hapdeng ka met kaba koit kaba khiah.
Naka liang u Block Medical Officer jong ka Amlarem, u Dr Arvind Khonglah u la ban jur ba ki Mobile tablet ba la sam sha ki ASHA kin ïarap shibun eh ïa ka Amlarem Block ban pynurlong ïa ki Aspirational Block KPIs kaban pynlah ïa ki ASHA ban pyndep ïa ka jingrung CBAC na ka bynta ka shnong/ka thaiñ jong ki.
