Shillong, Rymphang 06: U Nongialam ka Bharatiya Janata Party (BJP) bad kyrtong na Pynthorumkhrah constituency, bah A. L Hek hynne ka sngi ula kren da kaba shai kdar ba lada ka BJP ka ioh ban thaw sorkar hadien ka elekshon, la thikna ba un ioh bat iaka shuki Myntri Rangbah ka jylla.
U Bah Hek ula pynpaw ia kane hadien ka jingwan thep kyrteng kum u kyrtong sha ka elekshon MLA-2023, ia kaba la synran da u Myntri ka Sorkar Pdeng Dr Jitender Singh ba khmih ia ka Ministry of Science and Technology.
U bah Hek ula ong ba ka mat ba hakhmat eh ban iakhun ha kane ka ilekshon mynta ka kynti kadei kumno ban thaw ki lad lynti ioh kam iaki khun samla ka Pynthorumkhrah constituency bad ka jylla baroh kawei.
U bah Hek ula ong ba ki paidbah ka constituency bad ka jylla kila sdang ban pdiang iaka BJP namar kila iohi iaki kam ba ka BJP haka jingialam u Myntri Rangbahduh ka ri, u Narendra Modi kala leh naka bynta ka ri bad ka jylla.
“Namar ka jingshaniah bad ka jingkyrshan ki paidbah, nga thikna ba ngan jop biang bad nga kyrmen ruh ba ka Party kan jop bun ki kyrtong ha kane ka elekshon…lada ka BJP ka thaw sorkar hadien kane ka elekshon ban wan, ngan shimti kum u Myntri Rangbah ka jylla” ong u bah Hek.
Haba iadei bad ka jingkynnoh ba kum u MLA u khlem lah ban trei bha naka bynta ka constituency, u bah Hek ula ong ba lada ki paidbah ki iohi ba u MLA u khlem leh eiei naka bynta ka constituency, kin nym pynjop ia u haduh 5 sien.
Ula ong ba haka elekshon kin mih beit ki jingkynnoh hynrei ki paidbah ki long kiba stad bad ki iohi ia kaei ka ba ki nongmihkhmat ki leh naka bynta ka constituency bad ki paidbah nong shong shnong.
Nalor kane u bah Hek ula ong ba lada ka BJP ka ioh thaw sorkar bad ka ialam iaka sorkar hadien ka elekshon, ka sorkar BJP kan sdang ia ka jingtohkit pyrshah iaki ba shah kynnoh kam bamsap.
“Lada ka BJP ka ioh ban ialam iaka sorkar jylla, tang hapoh 90 sngi kan sdang ka jingtohkit pyrshah iaki jingkynnoh bamsap bad nga kular ha phi baroh, ba baroh kiba shah kynnoh bamsap kin ngat katkum ki kyndon ka ain” ong u bah Hek.
