Shillong, Rymphang 06: U President ka Trinamool Congress-Meghalaya bad kyrtong ka Nongthymmai konstitwensi bah Charles Pyngrope hynne ka sngi nyngkong, ula kob ba ka party kan poi sha ka thong ym tang ha Nongthymmai hynrei ha baroh kawei ka jylla.
Haha kren hadien ka jingwanthep kyrteng, u bah Charles ula ong ba kum u kyrtong ula pynkhreh bha bad lyngba ka jingkyrshan ki paidbah, u dang kyrmen beit ba un wanphai biang kum u MLA ka Nongthymmai konstitwensi.
U bah Charles ula ther ruh iaka National People’s Party (NPP) ka ba la kynnoh ba ka skhim WE bad MYE Card kadei Baki Card, daka ong ba ha West Bengal ruh kine ki skhim ki treikam bad ki seisoh bha bad naka liang ka AITC kan leh kumjuh ha Meghalaya lada ka wan haka bor hadien ka ilekshon.
Ula ong “iaka ba mynta ka AITC kam pat don ha ka bor, ym dei ban kynnoh ba ki skhim WE bad MYE Card kidei ki skhim ilekshon, dei ban kynnoh hadien ba ngi wan haka bor bad lada ngim lah pyntreikam ia kine ki skhim” la ong u bah Charles.
Haha iadei bad ka jingkynnoh ba ma u lem bad u Dr. Mukul Sangma kin mih noh naka AITC ban iasoh shaka BJP hadien ka ilekshon, u bah Charles ula ong ba ki jingkynnoh kin sah ki jingkynnoh.
