Shillong, Risaw 27 : U Myntri Rangbah ka Jylla Conrad K Sangma hynne ka sngi Palei u la ong ba ki kaiphod jong ki jingtohkit halor ki jingkynnoh jyrsieh ba bun jait bun rukom kila shem ba ki jingkynnoh ki dei tang ki jingkynnoh ha lyer.
“Ki jingkynnoh ki mih na ka por sha ka por. Hynrei ki jingtohkit kila sei madan ba kine ki jingkynnoh ki dei tang ki jingkynnoh ha lyer” ong u Conrad haba iakren bad ki nongthoh khubor.
Haba pynpaw ba ka Sorkar kam ju rieh na ka jingtreikam ba shai, u Myntri Rangbah ula kdew ia ka jingkynthoh jong u President ka Congress ma Vincent H Pala ba ong ba ka sorkar MDA ka dei kaba la tip kum ka sorkar ki jingtohkit, kaba dei kaba biang eh.
“Nga sngew ba ka dei kaba biang eh ba haba don kino kino ki jingsngewkhia ngim shym la rieh ialade. Ngi la ailad ia ki jingtohkit ban jia bad ki kaiphod ruh ngi la sei madan. Ngim shym la ailad ia ki ba kin pynsuki…namar kata, ka dei ka nuksa kaba shai ba kumno ka Sorkar ka kwah ban treikam haba shit haba shai” ula ong.
“Ki jingkynnoh hi kin iai mih beit bad ki jingtohkit ki dei kiba biang eh ban pynthikna ba ka jingtohkit kaba laitluid kan iaid bad ki jingshisha kin mih hynrei ha baroh ki jingkynnoh, ki kaiphod kila mih bad ngi la buh hakhmat u paidbah bad nga sngew ba ngim don eiei ban buhrieh” ula banjur.
Kat kum ka jingong jong u, jin ba ka Sorkar kam shym la thung ia ki jingtohkit, ki paidbah khlem pep kin ong ba ngi la buhrieh aiu re aiu.
